Mıýrreı Golovkınniń myqty jáne álsiz jerlerin atady
ASTANA. QazAqparat - Búgin WBA chempıony Gennadıı Golovkınmen jekpe-jek ótkizetin álem chempıony tıtýlyna úmitker brıtandyq boksshy Martın Mıýrreı óziniń jeńisine senimdi.
Mıýrreı tyńǵylyqty jattyǵýlary men moraldyq daıyndyǵy jaıynda sóz qozǵady.
«Men onyń barlyq myqty tustaryn qarap shyqtym. Onyń qatelikterin aıtpaı-aq qoıaıyn, sebebi onyń qımylynda aıtarlyqtaı min joq. Men Golovkınniń eń myqty jaqtaryn zerttedim. Barlyǵyn oı eleginen ótkizdim. Bul maǵan daıyn bolýǵa kómektesedi. Eń bastysy - onyń kúshine nazar salý kerek. Soqqylary joıqyn. Onyń sheberligi de joǵary deńgeıde, ol qarsylasyn óz yńǵaıyna qaraı kóndirip alady», - dedi ol.
«Ol myqty pancher ǵana emes, sonymen qatar sheber boksshy. Biraq biz onyń qorǵanysynan birdi-ekili kemshilikter baıqadyq. Maǵan sony paıdalanyp qalý kerek, meniń qolymnan barlyǵy keledi dep senemin. Jekpe-jek surapyl bolatyny anyq, men barlyq aýyrtpalyqtardy eńserýge daıynmyn. Bul meniń jekpe-jegim, meniń múmkindigim jáne men jeńisti ǵana oılaımyn. Kezdesý uzaq ári aýyr bolady. Rıngte naǵyz aıqas bolady, men oǵan daıynmyn. Sony taǵatsyzdana kútip otyrmyn», - dedi Martın Mıýrreı.
