Mıýnhendegi básekede Evgenıı Korolev álemniń 37-shi raketkasyn qapy qaldyrdy
ASTANA. 1 mamyr. QazAqparat - Qazaqstandyq tennısshi Evgenıı Korolev nemistiń Mıýnhen qalasynda jalaýyn kótergen ATP BMW Open-2013 dodasynyń ekinshi aınalymyna joldama aldy. Bul haqynda Vesti.kz jazyp otyr.
Birinshi aınalymda jerlesimiz Kıprdiń 27 jastaǵy ókili Markos Bagdatısti qapy qaldyrdy. Alǵashqy sette kıprlyq sportshynyń baǵy janyp, ol Korolevti 2:0 esebimen utqan. Biraq otandasymyz des bermeı, 11-shi geımde breıkke qol jetkizdi. Nátıjesinde oıynnyń alǵashqy bóligi 7:5 esebimen aıaqtaldy.
Ekinshi partııada jeńimpazdy taı-breık arqyly anyqtaýǵa týra keldi. Onda Korolev qarsylasynyń aldyn orap, 7:3 esebimen ozdy.
Aıta ketken jón, ATR reıtıngisi boıynsha qazaqstandyq tennısshi 195-shi satyǵa jaıǵasqan, al Bagdatıs álemniń 37-shi raketkasy sanalady. Buǵan deıin atalmysh qos sportshy ózara sheberlikterin synap kórmegen.
Kelesi aınalymda jerlesimizdiń joly Fılıpp Kolshraıbermen túıisedi. Bul nemis tennısshisi úshin básekedegi alǵashqy kezdesýge aınalmaq.
Aıta keteıik, Korolev jarystyń negizgi setkasyna biliktilik jarystary arqyly enip otyr.
