Mıýnhende júzdegen jolaýshy túndi ushaqta ótkizýge májbúr boldy

ASTANA. KAZINFORM – Germanııanyń ońtústiginde bolǵan kúshti jel saldarynan 500-ge jýyq jolaýshy túndi Mıýnhen áýejaıynda ushaqta ótkizýge májbúr boldy.

Tolassyz jaýǵan qar eldegi kólemi jóninen ekinshi áýejaıdyń tynysyn taryltyp, júzge jýyq reısti toqtatty, al qalǵandarynyń qashan ushary belgisiz edi.

Áýejaıdaǵy qarbalasty tyıý úshin Bavarııa dıspetcherlerine bir rettik jeńildik berilip, túngi reısterdi saǵat 01:00-ge deıin ushyrýǵa ruqsat etildi. Bul — túngi on ekiden tańǵy beske deıin ushýǵa qatań tyıym salynatyn Mıýnhen úshin tosyn sheshim edi.  

Keshkisin alys jáne jaqyn baǵyttaǵy birneshe reıske jolaýshylar otyrǵyzylyp, ushaqtar muzdan tazartylyp, ushýǵa ázirlendi. Alaıda tún aýa qardyń ekpini kúsheıip, qar tazalaý brıgadalary ushý jolaǵyn talapqa saı merzimde tazarta almaı qaldy. Nátıjesinde kezek kútip turǵan ushaqtarǵa ushýǵa ruqsat berilmedi.

Reıster birjola toqtatylǵanda, másele tek aýa raıynda emes, uıymdastyrý júıesinde ekeni anyqtaldy. Ushaqtar keri qaıtyp, jolaýshylardy termınalǵa túsire almady — barlyq turaq oryndary basqa borttarmen tolyp ketken. Áýejaıdyń resmı málimdemesinde dál sol sátte shamamen 500 adamdy tasymaldaýǵa qajetti avtobýstardyń bolmaǵany aıtyldy. Bul týraly Aviation.Direct habarlady.

Jalpy alǵanda, bes reıs tyǵyryqqa tireldi. Onyń tórteýi Lufthansa-ǵa, bireýi enshiles Air Dolomiti kompanııasyna tıesili.

Evakýatsııa tańǵy besten keıin ǵana bastaldy. Sol ýaqytta ádettegi reıster birtindep qalpyna kelip, qosymsha avtobýstar uıymdastyryldy.

Logıstıkalyq tuıyq

Lufthansa óziniń mundaı jaǵdaıǵa tap bolýy jerdegi qyzmetterdiń jumysynyń salaqtyǵyna baılanysty dep túsinedi. Al Mıýnhen áýejaıy kináni tosyn ári qatal qysqa artyp, bar resýrstyń sarqylǵanyn jetkizdi.

Ádette qyzmet sapasymen maqtanatyn áýejaı bul oqıǵadan keıin bedeline syzat túsirdi. Áleýmettik jelilerde sharshaǵan, qajyǵan jolaýshylardyń sýretteri tarap, baılanystyń joqtyǵy synǵa alyndy. Túngi ushýǵa arnaıy ruqsat berilgenimen, nege ol iske aspaǵany, nege termınalǵa keri jol jabylǵany kópshilikke túsiniksiz kúıde qaldy.

Sala sarapshylary tótenshe jaǵdaı josparynyń álsizdigin meńzeıdi. Avıatsııada borandy kúnderi ushaqtardyń kútýi qalypty jaıt bolǵanymen, tún ishinde alty saǵattan asa ýaqyt termınaldaǵy sanıtarlyq jaǵdaıǵa qol jetkize almaı, bortta qamalý — qyzmet kórsetý qaǵıdalaryna qaıshy áreket.

Endigi sóz — tekseriste. Nelikten jolaýshylarǵa basymdyq berilmedi? Qys jaǵdaıyna laıyq jerdegi qyzmetkerler jetispedi me?

Boran basylǵanmen, bul suraqtardyń borany áli basylar emes.

Osyǵan deıin Kolýmbııada joǵalǵan ushaqtyń apatqa ushyraǵany týraly jazdyq.