Mıýnhende turatyn Qazaqstan azamatshasy qaladaǵy jaǵdaı týraly aıtyp berdi
ASTANA. QazAqparat - Óziniń aty-jóni men jumys ornyn qupııa ustaýdy ótingen Mıýnhen qalasyndaǵy A. esimdi Qazaqstan azamatshasy keshe túnde atysqa baılanysty uzaq ýaqytqa deıin jumystan shyqpaı, qaladaǵy jaǵdaıdyń tynyshtalǵanyn kútken. Bul týraly ol bizge Feısbýk áleýmettik jelisinde áńgimelep berdi.
«Abyroı bolǵanda, men oqıǵa ornynan alys júrgenmin. Biraq, tún ortasyna deıin jumysta otyryp, kólikpen úıge qaıttym. Jol boıy jaǵdaıdyń tynyshtalǵanyn baıqadym. Keshe túngi saǵat 23.00-de qaladaǵy jaǵdaı ábden tynyshtaldy deýge bolady. Degenmen, birneshe polıtsııa kóligi dabylyn baıaý qosyp, kóshede júrdi. Patrýlder baıaý júrispen, qaladaǵy adamdardy qarap júrdi. Búgin ázirge úıden shyqqan joqpyn»,-deıdi ol.
Esterińizge sala keteıik, keshe Astana ýaqytymen keshki saǵat 22.00-de (Mıýnhende saǵat shamamen keshki 18.00 bolǵan) Mıýnhendegi «Olımpııa» saýda ortalyǵynda, Karlsplatts alańynda jáne metro stansasy janynda atys boldy.
Sońǵy málimetter boıynsha, Mıýnhendegi saýda ortalyǵynda bolǵan atystan qaza bolǵandardyń sany toǵyz adamǵa jetti.Polıtsııa málimetteri boıynsha, toǵyzynshy bolyp mert bolǵan shabýyl jasaǵan atqyshtardyń biri bolýy múmkin. Onyń qyzyl sómkesi bolǵan, onda bomba bolýy yqtımal ekeni aıtylǵan.
