Mıýnhende shógennen ótken halyqaralyq týrnırde qazaqstandyqtar jeńimpaz atandy
ASTANA. QazAqparat - Qazaqstandyq shógen komandalary - «Astana Polo Club» pen «Almaty Polo Club» Mıýnhende ótken «Munich Polo Cup 2017» jáne «Munchin Gold Cup 2017» halyqaralyq týrnırlerinen jeńispen oraldy, dep habarlaıdy Qazaqstan shógen federatsııasynyń baspasóz qyzmeti.
«Astana Polo Club» komandasy Gollandııa, Shveıtsarııa jáne Germanııa sekildi alpaýyt elderdi artta qaldyryp, «Munich Polo Cup 2017» (25-26 mamyr) halyqaralyq týrnıriniń jeńimpazy atandy.
Al «Munchin Gold Cup» (27-28 mamyr) halyqaralyq saıysynda «Almaty Polo Club» jeńiske jetip, Gollandııa, Germanııa jáne Shveıtsarııany shań qaptyrdy.
«Bizge bul jeńister ońaı keldi dep aıta almaımyz. Qarsylastarymyz óte myqty boldy, Eýropada shógen asa tanymal oıyn, biraq biz de des bermeımiz», - deıdi «Almaty Polo Club» komandasynyń kapıtany Qýanysh Musabekov.
«Bul bizdiń halyqaralyq arenadaǵy birinshi jeńisimiz emes. Máselen, «Astana Polo Club» komandasy 2016 jyly Argentınanyń Lýhan qalasynda ótken halyqaralyq týrnırden I orynmen oralǵan bolatyn. Sondaı-aq, 2017 jyly Argentınadaǵy «Santa Catalina Summer Cup» jáne «Torneo Summer Polo Match» halyqaralyq týrnırlerinde bizdiń komandalar sheteldik shógenshilerdi basyp ozyp, I orynnan kórindi. Bıyl óz elimizde ótken «Almaty Snow Polo Cup» halyqaralyq dodadada I oryn ózimizge buıyrdy. Al, 2017 jyly Argentınanyń Lýhan qalasyndaǵy halyqaralyq saıysta «Almaty Polo Club» jeńimpaz atanyp, eń úzdik komandalardyń qataryna qosyldy. Mine, Mıýnhendegi jeńis te bizdiń enshimizde », - deıdi Halyqaralyq shógen federatsııasynyń birinshi vıtse-prezıdenti Sársen Quranbek.
