Mıýnhende arnaıy operatsııaǵa baılanysty kólik qozǵalysy toqtatyldy
ASTANA. QazAqparat - Mıýnhende qaladaǵy polıtseılik arnaıy operatsııaǵa baılanysty kólik qozǵalysy túgeldeı toqtatyldy, dep habarlady MVG Muenchner Verkehrsgesellschaft mbH kólik kompanııasynyń Facebook-akkaýnty.
«Jolaýshylardyń esine: metro, avtobýstar jáne tramvaılar qatynasy polıtsııanyń nusqaýymen tolyqtaı toqtatyldy», - delingen habarlamada.
Mıýnhenniń basty vokzalynan qala ortalyǵyndaǵy atystan keıin adamdar kóshirildi, dep habarlady nemistiń ARD telearnasy temirjol basqarmasynyń málimdemesine silteme jasap.
Aldyn ala boljam boıynsha, qarýlanǵan úsh qylmysker Mıýnhenniń ár jerinde, sonyń ishinde iri saýda ortalyǵynda oq jaýdyrǵan. BAQ málimetteri boıynsha, birneshe adam mert bolǵan, jaralanǵandar bar. Keıinnen Karlsplatts alańynda da oq atyldy, dep jazady RIA Novostı.
«Kóshirý (vokzalda) polıtseılik arnaıy operatsııaǵa baılanysty júrgizildi», - delingen habarlamada.
Polıtsııa turǵyndardy ashyq alańdardan aýlaq bolýǵa jáne ınternetke oqıǵa bolǵan jerden beınejazba jáne fotosýretter salmaýǵa shaqyrdy,
Ártúrli derekkózderdiń habarlamalary boıynsha, qurbandar sany úshten 15 adamǵa deıin kórsetilgen. Zardap shekkenderdiń sany aıtylmaǵan. Aqparattyń resmı qýattalýy ázirge túsken joq.
