Mıýnhende adamdarǵa oq atqannyń kim ekeni anyqtaldy
ASTANA. QazAqparat - Mıýnhen polıtsııasynyń basshysy Gýbert Andre tergeýdiń alǵashqy aqparattarymen bólisti, dep habarlady Bı-Bı-Sı agenttigi.
Mıýnhen polıtsııasy qala ortalyǵyndaǵy saýda úıleriniń birinde adamdarǵa oq atqan 18 jastaǵy tegi ırandyq Germanııa azamaty ekenin habarlady.
Gýbert Andreniń aıtýynsha, ol Germanııa azamaty jáne Mıýnhende birneshe jyl turǵan.
Polıtsııa ókili kúdiktiniń ózi jalǵyz qylmys jasaǵanyn jáne buryn-sońdy isti bolmaǵanyn aıtty.
Qarýly shabýyl jasaǵan adamdy izdeý barysynda polıtseıler onyń múrdesin tapty. Ony polıtsııa óltirdi me, álde ózine qol jumsady ma, ázirge belgisiz.
Eske sala keteıik, 22 shilde kúni keshki ýaqytta Mıýnhendegi «Olımpııa» saýda úıi mańynda belgisiz bireý oq jaýdyryp, toǵyz adam qaza tapty. Úsh adamnyń shabýyl jasaǵany týraly da aqparat bar.
Bıliktiń málimeti boıynsha, 20 adam jaraqat alǵan, onyń úsheýi aýyr halde jatyr.
