Mıýnhende 80 japondyq jolaýshy ushaq bortynda ózderin nashar sezindi
ASTANA. Naýryzdyń 22-si. QazAqparat - 80 japondyq jolaýshy ózderin nashar sezinýine baılanysty, Mıýnhende ushqaly turǵan laıner joldan qaldyryldy,
dep habarlaıdy RBK agenttigi.
Lufthansa áýe kompanııasynyń bortynda 314 jolaýshy bolǵan A340-600 ushaǵy Mıýnhennen Tokıoǵa ushýy kerek bolǵan. Laıner ushý alańyna shyǵyp qoıǵan kezde, japondyq týrısterdiń basshylyǵy ushqyshqa tótenshe habar jetkizgen.
Japondyqtardyń kenetten ishteri búrip aýyra bastaǵan, bastary aınalyp, loqsyǵan. 23 adam jergilikti aýrýhanaǵa jetkizilse, 57 japondyq jolaýshy dárigerlerdiń baqylaýymen otelderge jaıǵastyrylǵan. Birneshe saǵattan keıin ushaq Tokıoǵa ushyp shyqty, dep habarlaıdy Associated Press agenttigi.
Reısten alyp qalynǵan japondyqtardyń ózderin nashar sezinýlerine ne sebep bolǵany ázirge anyqtalǵan joq, biraq, áýe kompanııasynyń ókilderiniń málimdeýinshe, olardyń ushaq bortynda beriletin tamaqtan ýlanýy múmkin emes.
