Mıýnhen konferentsııasy: Qytaı men EO-nyń 5G jelisine qatysty máselesi talqylandy
Konferentsııa barysynda ótken sessııa jumysynda Qytaı Syrtqy ister mınıstrine Huawei kompanııasyna qatysty saýal qoıyldy. «Eger de Eýropalyq odaq qytaılyq Huawei kompanııasynyń 5G jelisi boıynsha qatysýyna shekteýdi qabyldasa, onda Qytaı qandaı is-qımyldar jasaıdy?» dep surady konferentsııa qatysýshysy.
«Kóp jyldardan beri Eýropalyq odaqpen baılanystardy damytyp kelemiz, osy ýaqyt aralyǵynda álemdegi jaǵdaı ózgeriske ushyrady. Bizde jan-jaqty strategııalyq seriktestigimiz bar jáne onyń deńgeıi joǵary. Árıne, kelispeýshilik jaǵdaılar da kezdesedi. Máselen, bizde ártúrli áleýmettik júıelerimiz bar, qundylyqtardy ártúrli qabyldaıtyn sátter de kezdesedi. Alaıda bul kelispeýshilikter júzdegen jyldar buryn da bolǵan edi. Sebebi bul aıyrmashylyqtar bizdiń tarıhpen, mádenıetpen baılanysty», - dep toqtaldy Van I qoıylǵan suraqqa jaýap bere otyryp.
Dıplomattyń atap ótýinshe, EO men QHR ózara tájirıbeleri arqyly bir-birinen sabaq alýy tıis.
«Sondyqtan Qytaı men Eýropa úshin durys qadam – ol ortaq progress pen gúldenýge jetý úshin bir-birimizdiń tájirıbemizden sabaq alý. Álemge EO men QHR-ǵa qatysty yntymaqtastyq kerek. Qytaı men Eýropa arasynda qaıshylyq emes, kerisinshe yntymaqtastyqtyq ortaq núkteleri basymyraq dep sanaımyz», - dedi Van I.
Onyń sózine qaraǵanda, QHR men EO jan-jaqty strategııalyq seriktestikti qurdy.
«Osy oraıda Eýropa osy seriktestiktiń mańyzdylyǵyn nazarǵa alyp, ózara tıimdi baılanystardy qamtamasyz etý úshin birlesken kúsh-jigerin salady dep úmittenemiz. Búginde 5G ózekti taqyryptardyń biri. Bul turǵyda eýropalyq elderdiń ustanymy ártúrli ekenin bilemin. Árıne, árbir memleket aqparattyq qaýipsizdik salasynda jekeleı sheshim qabyldaıdy. Degenmen de barlyq kompanııalar úshin teńdeı jaǵdaı jasaý kerek, sondaı-aq kompanııalar qyzmetine ádiletti atmosferany qurǵan jón bolar. Bul qadamdar naryqtyq talaptar men normalarǵa saı keledi», - dedi QHR Syrtqy ister mınıstr.