Mıýnhen fılarmonııasynyń kontserti ızraıldik dırıjerdiń qatysýyna baılanysty toqtatyldy

ASTANA. KAZINFORM — Belgııanyń Gent qalasyndaǵy Flanders Festival mýzykalyq festıvaliniń uıymdastyrýshylary Mıýnhen fılarmonııalyq orkestriniń kontsertin toqtatý týraly sheshim qabyldady, dep habarlaıdy DW.

Olar bul sheshimdi orkestrdiń bolashaq bas dırıjeri, ızraıldik pıanıst Lahav Shanıdiń qatysýymen túsindirdi.

Festıval uıymdastyrýshylary Shanı birneshe ret beıbitshilik pen kelisim týraly sóz qozǵaǵanyna qaramastan, ol Izraıl fılarmonııalyq orkestriniń bas dırıjeri bolǵandyqtan, Tel-Avıvtegi genotsıdtik rejımge qatysty óz ustanymyn aıqyn bildire almaıtynyn atap kórsetti.

Uıymdastyrýshylardyń aıtýynsha, olar «mádenıet mınıstriniń, Gent qalalyq keńesiniń jáne qalanyń mádenıet salasy ókilderiniń úndeýlerine jaýap retinde» bul sheshimdi qabyldap, festıvaldegi tynyshtyqty saqtaý jáne kórermender men mýzykanttardyń qaýipsizdigin qamtamasyz etýge tyrysqan. Olar naqty qaýip-qaterler bolǵan-bolmaǵanyn atap kórsetpedi.

Germanııa Federatıvtik Respýblıkasynyń mádenıet jáne BAQ jónindegi memlekettik mınıstri Volfram Vaımer festıval uıymdastyrýshylarynyń sheshimin «taza antısemıtızm» jáne «Eýropa úshin uıat» dep baǵalady.

— Bizdiń habarlamamyz aıqyn: biz óz orkestrlerimizdi nemese evreı ónerpazdaryn shettetýge jol bermeımiz, — dedi memlekettik mınıstr.

36 jastaǵy ızraıldik pıanıst Lahav Shanı Mıýnhen fılarmonııalyq orkestrdiń bas dırıjeri retinde 2026 jyldyń qyrkúıeginde ǵana qyzmetke kirisedi. Ol osy ýaqytqa deıin Rotterdam fılarmonııalyq orkestrinde kelisimshartpen jumys isteıdi. Gent qalasynda toqtatylǵan kontsert osy jyldyń qyrkúıeginde ótýi tıis edi.

Budan buryn habarlanǵandaı, Izraıl Parlamenti áskerı shyǵyndarǵa qosymsha 31 mlrd shekel (9 mlrd dollardan astam) bólý týraly zań jobasyn maquldady.