«Mıýnhen-2018» uıymdastyrý komıtetiniń delegatsııasy «Medeý» muz aıdynynda boldy
ALMATY. 1 aqpan. QazAqparat /Elena Ilınskaıa/ - Búgin Katarına Vıtt bastaǵan Mıýnhen-2018» uıymdastyrý komıtetiniń delegatsııasy Almatydaǵy «Medeý» muz aıdynyn kórdi.
Mıýnhen delegatsııasy Qazaqstanǵa alǵash ret kelip otyr jáne olar Azııalyq olımpıadalyq komıtettiń, onyń ishinde Ulttyq olımpıadalyq komıtettiń joǵary laýazymdy ókilderimen kezdesýler jáne birqatar brıfıngter ótkizdi.
«Mıýnhen-2018» uıymdastyrý komıtetiniń tóraıymy Katarına Vıtt hanymnyń aıtýynsha, olardyń saparlarynyń maqsaty - qysqy Azııalyq oıyndardyń uıymdastyrylý deńgeıine baǵa berý.
«Biz basqa elderden kóp nárseni úırene alamyz. 2018 jylǵy qysqy Olımpıada oıyndaryn laıyqty deńgeıde ótkizý úshin, biz olımpıadalyq qoǵamdastyqtyń pikirlerine árqashan qulaq túrýge daıynbyz», dedi K.Vıtt hanym.
K.Vıtt hanymnyń aıtýynsha, jańa múmkindikterdi ashyp otyrǵan damýshy elderdegi negizgi sporttyq sharalardy tamashalaý árqashan qyzyqty. Germanııanyń qysqy sporttyq oıyndardy jáne basqa da negizgi sporttyq sharalardy ótkizýdegi tájirıbesi mol jáne osy jaıt Mıýnhenniń 2018 jylǵy Oıyndardy ótkizýge sózsiz daıyn ekenin dáleldeıdi.
