Mysyrlyqtar AQSh dollaryn jappaı ótkizip jatyr
ASTANA. QazAqparat - Mysyrda ulttyq valıýta - mysyrlyq fýnttyń nyǵaıa túsýine baılanysty jergilikti turǵyndar bankter men aqsha aıyrbastaý beketterinde dollarlaryn jappaı satyp jatyr, dep habarlaıdy QazAqparat «RIA Novostı» agenttigine silteme jasap.
Osy aptada azamattar bankke kún saıyn 50-60 mıllıon dollardan ákelý ústinde.
Budan da kúrdeli jaǵdaı Mysyrdyń ońtústik provıntsııalarynda qalyptasyp otyr. «Ál-Ahram» gazetiniń habarlaýynsha, onda amerıkalyq valıýtadan tezirek qutylǵysy kelgenderdiń uzyn-sonar kezegi qalyptasty.
Munsha kóp adamnyń AQSh dollarynan bas tartýy onyń odan saıyn quldyraýyna ákep soqtyrýda , al suranys joqtyń qasy.
«Ál-Ahram» gazetiniń derekterine súıensek, dollardy jınaqtaý valıýtasy retinde paıdalanýdan bas tartyp jatqan azamattardyń sany kún sanap ósýde.
Sonymen birge, sarapshylar mysyrlyq fýnttyń ósýi Mysyrdaǵy ekonomıkalyq jaǵdaıdyń turaqtalǵanyn bildirmeıtinin aıtyp, asyqpaýǵa keńes berýde. Mysyr ekonomıkalyq zertteýler forýmynyń basshysy Rashad Abdýdiń túsindirýinshe, jergilikti valıýta baǵamynyń ósýi ekonomıka men qarjy týraly jetkilikti bile bermeıtin qarapaıym azamattardyń pozıtıvti boljamdarynan bolýy múmkin.
