Mysyrlyq tarap stýdentter týraly resmı aqparat áli bergen joq - SІM
ASTANA. QazAqparat - Mysyrdyń quqyq qorǵaý organdary qazaqstandyq stýdentter týraly resmı aqparat áli bermeı otyr. Bul jaıynda QR Syrtqy ister mınıstrligi baspasóz qyzmetiniń jetekshisi Ánýar Jaınaqov Feısbýktegi paraqshasynda jazdy, dep habarlaıdy QazAqparat.
«Mysyrdyń quqyq qorǵaý organdary ustalǵan otandastarymyzǵa qatysty tıisti taraptyń áli kúnge deıin olardyń qaıda ekendigi týraly resmı aqparat usynbaǵandyǵyn habarlaımyz. Mysyrlyq resmı bıiliktiń sendirýinshe, olar din aman jáne qaýipsiz jaǵdaıda ustalyp otyr. Kaırdegi Qazaqstan Elshiligi bılikten túsindirýlerine jáne konsýlymyzdyń qazaqstandyqtarmen kezdesýin qamtamasyz etýine talap qoıýda»,- dedi ol.
Jaınaqovtyń beıresmı aqparattarǵa súıenip jazýynsha, Mysyrdaǵy birqatar lańkestik áreketten keıin engizilgen tótenshe jaǵdaı rejımi kezinde eldiń ulttyq qaýipsizdigine qaýip tóndirýi múmkin degen jeleýmen adamdardy ustaý operatsııalary júrgizilip jatyr.
«Osyǵan baılanysty Elshilik Mysyrda ýaqytsha júrgen qazaqstandyq azamattardyń arasynda jergilikti zań talaptaryn qatań saqtaý qajettigi týraly túsindirý jumystaryn júrgizip, quqyq qorǵaý organdarymen baılanysqan kezdegi zańdy quqyqtary týraly aqparattandyrýda.
Qazaqstannyń SІM basshylyǵy Mysyrdaǵy otandastarymyzdyń taǵdyryna qatysty máseleni erekshe baqylaýda ustaýda. Biz shetelde otandastarymyzdyń zańdy quqyqtaryn qorǵaý jumystaryn jalǵastyra beremiz jáne bul jumystardyń nátıjeleri týraly onyń bizge kelip túsýine qaraı qoǵamdyq aqparattandyryp otyramyz. Búgin Qazaqstan Elshisi Kaırde Mysyr Syrtqy ister mınıstriniń orynbasarymen taǵy da júzdesedi», - dep jazdy Ánýar Jaınaqov.
