Mysyrǵa daǵdarystan shyǵý úshin 100 mlrd dollar qajet
ASTANA. 15 aqpan. QazAqparat - Mysyr ekonomıkasy daǵdarystan shyǵyp, jandanyp-jańǵyrýy úshin 100 mlrd dollar, al qazirgi turalaǵan «kóterem» kúıinen aıyǵý úshin 12 mlrd dollar qajet eken. Ultty qutqarý maıdanyna kiretin kongress partııasynyń jetekshisi Amr Musa osyndaı málimdeme jasady. Bul jaıynda al-Arabiya habar taratty.
Arab jáne sheteldik máselelermen aınalysatyn keńestiń uıytqy bolýymen Kýveıtte ótken konferentsııada sóılegen sózinde ol Mysyr ekonomıkasynyń qaterli kezeńde turǵanyn, odan eldi tıimdi basqarý arqyly shyǵýǵa bolatynyn jetkizgen edi.
muslim.kz saıtynyń jazýynsha, saıasatker Halyqaralyq valıýta qorynyń, Dúnıejúzilik banktiń, Eýropalyq odaqtyń, Azııa elderiniń, Parsy shyǵanaǵyndaǵy arab memleketteriniń yntymaqtastyq keńesiniń, Latyn Amerıka elderiniń, arab elderiniń, Indonezııa jáne Túrkııa sekildi ıslam memleketteriniń basyn qosyp, Mysyr ekonomıkasyn qoldaýǵa baǵyttalǵan halyqaralyq konferentsııa ótkizýdiń qajettiligine toqtalǵan bolatyn.
Ol atalǵan elder men uıymdardyń el ekonomıkasyna ınvestıtsııa quıýǵa qulshynys tanytatynyna senim bildirgen edi. Onyń bulaısha senim bildirýin Mysyrdyń aımaqtaǵy jetekshi el bolyp tabylatyn artyqshylyǵymen baılanystyrýǵa bolady. Mysyr ekonomıkasynyń kúıreýine eshbir el múddeli emes.
Jyǵylǵanǵa judyryq bolyp, el qazynasyna aıtarlyqtaı tabys ákeletin týrızm salasynyń da alǵa basqan qadamy keri ketip, aqsap tur. Týrıstik kompanııalar elge aǵylyp keletin týrıster sanynyń kúrt azaıyp ketkenin alǵa tartyp otyr. Osy salanyń jiligin shaǵyp, maıyn ishken sarapshylardyń aıtýynsha, sheteldik qonaqtardyń arasynda elde bolyp jaǵdaıdy eleń qylmaıtyn arab elderinen kelgenderdiń qarasy kóp.
Al Eýropadan keletin týrısterdiń qatary edáýir kemigeni baıqalady. Týrıstik salanyń boıyna qan júgirtetin de solar ekenin eskerý kerek. Týrıstik aýdandardaǵy meımanhanalarǵa keletinderdiń qatary 60 paıyzǵa sıregen. Osynyń kesirinen kóptegen kóńil kóteretin oryndar jabylyp, osy salada jumys isteıtin qyzmetkerlerdiń 50 paıyzy qysqartýǵa ushyraǵan.
