Mysyrdyń vıtse-prezıdenti oppozıtsııamen kelissóz júrgizdi
ASTANA. 7 aqpan. QazAqparat - Mysyrdyń vıtse-prezıdenti Omar Súleıman oppozıtsııa ókilderimen, onyń ishinde elde qyzmetine tyıym salynǵan «Musylman baýyrlar» tobynyń múshelerimen de kelissóz júrgizdi,
dep habarlaıdy «Maıak» radıosy.
Kelissózge oppozıtsııalyq zaıyrly partııalardyń ókilderi, quqyq salasyndaǵy táýelsiz sarapshylar, isker top ókilderi, atap aıtqanda, mıllıarder Nagıb Savırıs, sondaı-aq MAGATE-niń burynǵy basshysy Mohammed ál-Baradeı qatysty.
Taraptar daǵdarystan shyǵý jónindegi barlyq qadamdardyń qoldanystaǵy konstıtýtsııanyń aıasynda qabyldaný kerektigine kelisti.
Qorytyndy qujatta kórsetilgen barlyq sharalar ýaqytsha mazmunǵa ıe jáne olar eldiń qazirgi basshysy Hosnı Múbaraktyń ókilettik merzimi aıaqtalǵannan keıin ótetin prezıdenttik saılaýǵa deıin saqtalady. Bul degenimiz, memleket basshysynyń dereý otstavkadan ketýi týraly talap jumsardy degen sóz.
Dıalogqa qatysýshylar qol jetkizgen taǵy bir negizgi kelisim - Múbaraktyń 1 aqpanda halyqqa jasaǵan úndeýiniń barlyq mindettemelerin oryndaý kepildigi boldy. Bul jerde, Múbaraktyń jańa prezıdenttik saılaýǵa óz kandıdatýrasyn usynbaý jáne «bıliktiń konstıtýtsııaǵa sáıkes beıbit jolmen berilýine» kepildik berilýi týraly sóz bolyp otyr.
Dıalogtyń taǵy bir mańyzdy nátıjesi - osydan 30 jyl buryn engizilgen tótenshe jaǵdaıdyń kúshin toqtatý týraly sheshim boldy. Bul sheshimniń kúshi yqtımal syrtqy yǵyttarǵa baılanysty bolýy múmkin. Biraq ta, qalaı bolǵanda da tótenshe jaǵdaı prezıdenttik saılaýǵa deıin alyp tastalynýy kerek.
Esterińizge sala keteıik, Mysyrdaǵy halyq narazylyǵy 25 qańtardan beri jalǵasyp keledi. Manıfestshiler 1981 jyldan beri bılik basynda kele jatqan prezıdenttiń otstavkasyn, ekonomıkalyq reformalardyń júrgizilýin jáne jemqorlyqpen kúres jónindegi tıimdi sharalardyń qabyldanýyn talap etýde.
