Mysyrdyń Úkimeti resmı túrde otstavkaǵa ketti
ASTANA. 29 qańtar. QazAqparat - Mysyrda Mınıstrler kabınetiniń otyrysy ótip, onyń qorytyndysy boıynsha el Úkimeti resmı túrde otstavkaǵa ketti, dep habarlaıdy RBK.
Ótken túnde Mysyr Prezıdenti Hosnı Múbárak halyqqa joldaý arnady. Onda Mysyr Prezıdenti elinde ekonomıkalyq jáne saıası reforma júrgizýde daıyn ekendigi jóninde málimdedi jáne Úkimetti taratyp jiberdi. Jańa Mınıstrler kabınetiniń músheleri búgin aıtylady dep kútilýde.
Budan buryn habarlaǵanymyzdaı, Mysyrda narazyq aktsııasyna qatysqan myńǵa tarta adam tutqyndaldy, dep habarlady úkimet ókilderine silteme jasaǵan Agence France-Presse aqparattyq saıty.
Buǵan deıin úkimetke qarsy narazylyq bildirgen jeti júz adamnyń ustalǵany týraly aıtylyp edi.
Narazylyq sherýin uıymdastyrýshylar seısenbi kúni bastalǵan Kaır men Sýetsti qospaǵanda taǵy da basqa qalalarda aktsııany jalǵastyrýdy kózdep otyr. Ereýilshilerdiń negizgi talaptary - bılik basynda otyz jylǵa tarta otyrǵan prezıdent Hosnı Mýbaraktyń otstavkasy bolyp tabylady.
Mysyrda uıaly baılanys jumys istemeıdi, sondaı-aq Internet jumysynda da irkilis baıqalýda.
Atap aıtqanda, SMS-habarlamalar jiberilgen jerine jetpeýde, Facebook, Twitter jáne Blackberry Messenger sııaqty birqatar saıttar paıdalanýshylarǵa jabyq. Ǵalamdyq jelilerdi paıdalanýshylar el astanasy Kaır qalasynda Internetke qoljetimdilik keıde túgelimen joǵalyp ketse, keıde paıda bolatynyn atap ótýde, biraq Internet barynsha shaban jumys isteıdi. Kóptegen adamdar bul irkilisti sherýge qatysýshylar atalǵan áleýmettik jelilerdiń kómegimen jańa aktsııalardy uıymdastyrý máselesin kelisedi dep bıliktiń qaýiptenip jatqanymen baılanystyryp otyr.
