Mysyrdyń burynǵy prezıdenti memlekettik qupııalardy jarııa etkeni úshin aıyptalýda
ÁBÝ-DABI. QazAqparat - Mysyr prokýratýrasy jeksenbi kúni eldiń burynǵy prezıdenti Muhammed Múrsıdi memlekettik qupııa bolyp tabylatyn málimetterdi jarııalap, ony Iranǵa taratty dep aıyptady.
Jeksenbi kúni Kaırde bılikten alastatylǵan M.Múrsıdiń jáne onyń 35 sybaılastarynyń isi boıynsha ekinshi sot tyńdaýy bastaldy. Aıyptaýshy tarap «Musylman aǵaıyndar» mysyrlyq bólimshesiniń kóshbasshysy eldegi jaǵdaıdy turaqsyzdandyrý maqsatynda sheteldik memlekettermen, HAMAS palestınalyq qozǵalysymen sóz baılasqan dep otyr.
Mysyrdyń baspasóz quraldary osy tyńdaý kezinde M.Múrsıdi daýystar estilmeıtin shynydan jasalǵan jeke kabınaǵa otyrǵyzǵan dep jazady. Bul shara aıyptalýshylar daýystap qarsylyq bildirýlerimen sot isine kedergi jasamas úshin qoldanylǵan bolýy múmkin.
Sot kináli dep tapqan jaǵdaıda M.Múrsı men olardyń sybaılastary ólim jazasyna kesiledi.
