Mysyrdy sońǵy júz jylda bolmaǵan alapat qýańshylyq jaılady
ASTANA. QazAqparat - Jergilikti bılik Mysyrda sońǵy júz jylda bolmaǵan alapat qýańshylyqqa klımattyń ózgerýi sebep degen pikir aıtyp otyr. Alaıda halyqtyń oǵan sengisi joq.
Ásiirese, Egıpettiń soltústigindegi Dakahlııa provıntsııasynda ornalasqan El-Arab Magýb aýylynyń turǵyndary sýǵa zárý. Turǵyndar tirshilik nárin ózderi qazǵan qudyqtan alady. Alaıda olar sýdy jýynýǵa bolmasa, ishýge, as ázirleýge jaramsyz ekenin aıtady, dep habarlaıdy «24KZ» arnasynyń tilshisi.
«Biz bıliktiń qolynan kelmeıtin zatty surap otyrǵan joqpyz. Biz aýyz sýǵa zárýmiz. Buǵan deıin talaı márte jergilikti bılikke talaptarymyzdy aıtqan bolatynbyz. Olar jýyq arada bul máseleni sheship beremiz dep ýáde etkenimen, esh nátıje joq. Búginde sý tapshylyǵynan Dakahlııa provıntsııasyndaǵy taǵy bir eldi meken japa shegip otyr»,-deıdi jergilikti turǵyn Vagı Muhammed.
Al El Hafer Shebab aýylyndaǵy fermerler qýańshylyq kesirinen taýyp júrgen nápaqalarynan aıyrylyp otyrǵandaryn qynjyla jetkizdi.
Sýǵa zárý bolǵan jergilikti halyq bul jaǵdaıdy «Efıopııanyń qaıta órkendeýiniń Uly dambasy» jobasymen baılanystyryp otyr. Sýdanmen aradaǵy shekaraǵa jaqyn ornalasqan nysannyń qurylysy 2011 jyly bastalǵan bolatyn. Mysyrlyqtar «Nil ózenindegi sý deńgeıiniń tómendeýine sonyń kesiri tıdi» degen pikirde. Al Sý resýrstary mınıstrliginiń ókili Hanı Dabıstiń aıtýynsha, bul jaǵdaıǵa Efıopııanyń qaıta órkendeýiniń Uly dambasynyń qatysy joq. Ol klımattyń ózgerýinen týyndaǵan másele.
Bul sońǵy 103 jyl ishindegi eń alapat qurǵaqshylyq. Ol azdaı, sharýalar sýdy kóp talap etetin kúrish sekildi daqyldardy ósiredi. Bul da jaǵdaıdy órshitip otyrǵany sózsiz.
Jalpy halyq sanynyń ósýine baılanysty 2025 jylǵa deıin mysyrlyqtar arasynda sýdy tutyný mólsheri eki esege artýy múmkin. Sarapshylar osylaı dep topshylaıdy. Sondyqtan 9 jyldan keıin eldegi egis alqaptarynyń 60%-y kúıip ketýi ǵajap emes.
