Mysyrdaǵy jaǵdaıdyń saldarynan Beıbarys sultan kesenesin jóndeý jumystary aıaqtalmaı qalýy múmkin

Búgin Parlament Senatynyń jalpy otyrysynda senator Orynbaı Rahmanberdıev osy máseleni kóterip, Úkimet basshysynyń atyna saýal joldady. Onda depýtat  baba murasyn jańǵyrtý úshin Qazaqstan tarapy keseneniń jóndeý jumysyn ózi tolyq kóterip alsa degen tilegin bildirdi.

2005 jyly Memleket basshysy N. Nazarbaev Beıbarys sultan babamyzdyń Mysyr astanasy Kaır qalasynda osydan 7 ǵasyr buryn salyp ketken meshit-medresesin kúrdeli jóndeýden ótkizýdi Úkimetke tapsyrǵan bolatyn. Sonyń nátıjesinde Qazaqstan men Mysyr memleketiniń mamandary kúrdeli jóndeý jumystary úshin jobalyq-smetalyq qujattaryn daıyndap, buǵan jalpy kólemi 12 mln. dollar qarajat bólý belgilengen. Bul qarajatty eki memleket birlesip tóleýge ýaǵdalasqan. Sodan beri ǵımarat úshin qaýipti másele - jerasty sýy bolǵandyqtan, odan qorǵalatyn jańa júıeler, meshit qabyrǵalaryn qaıta qalpyna keltirý, mármárdan jasalǵan baǵanalardy turǵyzý sekildi jumystary atqarylypty. Qazaqstan buǵan respýblıkalyq bıýdjetten 4,5 mln. dollar qarajat bólip, bul qarajat tolyǵymen ıgerilgen.

«Alaıda, sońǵy ýaqytta Mysyrdaǵy saıası jaǵdaılarǵa baılanysty ol elden qarajat bólý máselesi sheshilmeı qaldy. Sondyqtan da jóndeý jumystary toqtap, endigi kúni keseneniń aıaqtalmaı qalý qaýpi týyndaıdy. Babalarymyzdan qalǵan «óli razy bolmaı, tiri baıymas» degen naqyl bar. Kóneden jetken, arab áleminiń maqtanyshyna aınalǵan, qazaq dalasynyń perzenti bahadúr babamyz saldyrǵan meshit-medreseni odan ári jańǵyrtý jumystaryna qarajat bólip, ony tolyǵymen aıaqtap, irgeli el ekenimizdi búkil arab eli men barsha álemge pash etýimiz kerek», - dedi senator O. Rahmanberdıev.

«Qypshaq dalasynda dúnıege kelip, arab elderiniń basyn qosyp, qýatty memleket qurǵan Áz-Zahır Beıbarys Sultannyń ómiri bizdiń rýhanı álemimizdi oıatatyny aqıqat. Beıbarys babamyz krest joryqshylary men Shyńǵyshannyń joıqyn áskerine toıtarys bergen birden bir tarıhı tulǵa ekenin álem moıyndaıdy. Beıbit ómir kezinde de Sultan Beıbarys mádenıetke, sáýlet ónerin damytýǵa erekshe mán bergen. Sonyń biri Mysyr astanasy Kaır qalasyndaǵy 7 ǵasyr buryn salynǵan meshit-medreseni aıtýǵa bolady», - deıdi senator.