Mysyrdaǵy tártipsizdikter 31 adamnyń ómirin jalmady
ASTANA. 27 shilde. QazAqparat - «Musylman baýyrlar» ıslamshylar qaýymdastyǵynyń ókilderi 27 shildege qaraǵan túni jappaı tártipsizdikter barysynda taqtan taıdyrylǵan Mohammed Mýrsıdiń kem degende 31 jaqtaýshysy qaza tapqanyn málimdedi.
170-ten astamy jaraqattandy. Buǵan deıin, 23 adamnyń opat bolǵany habarlanǵan bolatyn. Sherýshiler sý atqyshtarmen jáne kóz jasaýratatyn gazben taratylyp, áskerıler narazylyq bildirýshilerge oq boratty. Biraq atalmysh aqparatty mysyr bıligi rastamaı otyr.
Taıaýda Mysyrda «Musylman baýyrlardyń» uıymdastyrýymen M.Mýrsıdi qoldaýǵa baǵyttalǵan narazylyq sharasy ótti. Áskerı qolbasshylyq ıslamısterdi sherýlerden bas tartýǵa, al M.Mýrsıdiń jaqtaýshylaryn sóz sóıleýdi toqtatýǵa shaqyrdy.
Áskerıler «Musylman baýyrlarǵa» merziminen buryn parlamenttik jáne prezıdenttik saılaý ótkizýdi qarastyratyn «jol kartasyna» 48 saǵattyń ishinde qosylý týraly úzildi-kesildi talap qoıdy. Islamshylar daýys berýdi elemeýge shaqyrady.
Eske sala keteıik, áskerıler «Musylman baýyrlar» qozǵalysynyń kósemi M.Mýrsıdi oryntaǵynan taıdyrǵan bıylǵy 3 shilde kúni jańa egıpettik úkimet bılikke keldi. Memleket basshysynyń mindetin atqarýshy qyzmetine Mysyr Konstıtýtsııalyq sotynyń tóraǵasy Adlı Mansýr taǵaıyndaldy. Áskerıler ázirlegen josparǵa sáıkes partııalyq múddelerden erkin ótpeli úkimet qurý kózdelip otyr. Konstıtýtsııa qaıta qarastyrylǵannan keıin parlamenttik jáne prezıdenttik saılaý ótedi.
