Mysyrdaǵy sýdaǵy taksı qala turǵyndarynyń da, týrısterdiń de qyzyǵýshylyǵyn týǵyzyp otyr

ASTANA. QazAqparat - Sýdaǵy taksı. Mysyr astanasy Kaırde bıyl iske qosylǵan osyndaı tyń joba búginde jergilikti turǵyndar ǵana emes, elge aǵylǵan sheteldik týrıster arasynda da úlken tanymaldylyqqa ıe bolyp kele jatyr.

 Mysyrdaǵy sýdaǵy taksı qala turǵyndarynyń da, týrısterdiń de qyzyǵýshylyǵyn týǵyzyp otyr

Talaıǵa tańsyq kóringenimen, tabys ákeletin tıimdi kásip qazir kópshiliktiń qyzyǵýshylyǵyn týǵyzýda, dep habarlaıdy 24.kz.
Jyl basynan beri Kaırde 10 sýdaǵy taksı qoldanysqa berilgen. Qazir jergilikti turǵyndar kóliktiń bul túrin belsendi túrde qoldanyp júr. Halyq onyń arqasynda dittegen jerine temir tulparmen júrgennen góri tezirek jetip, joldaǵy keptelisterdi edáýir jeńildetýge bolatynyn aıtady. Onyń ústine kemeler gazben qozǵalatyndyqtan, qalanyń ekologııasyna da keri áseri az bolady eken.

Jergilikti turǵyn Ahmad Farýktyń aıtýynsha Nil ózeni ústimen júıtkıtin sýdaǵy taksı keremet ıdeıa. «Men ádette jumysqa jetý úshin kólikpen 40 mınýt júrip baratynmyn. Al myna kememen nebári 12 mınýt qana jumsaımyn. Onyń ústine jol-jónekeı ádemi peızajdy tamashalap baramyz»,-deıdi ol.

Nile Taxi kompanııasynyń ıesi Magdı Galı álem boıynsha joldaǵy keptelisterdiń 68%-y jekemenshik kólikterdiń kóptiginen týyndaıtyndyǵyn aıtady. «Sondyqtan biz tasymaldyń ózge túri jaıly tereń zerttep-zerdeleı bastadyq. Sol kezde Nil ózeni kólik potentsıalynyń úlken ekenine kóz jetkizdik». Halyqty qyzyqtyryp otyrǵan taǵy bir jaıt - sýdaǵy taksı qyzmetiniń aqysy. Jurttyń sózine qaraǵanda, olardyń baǵasy kádimgi taksıden góri áldeqaıda arzan.  

Imam Muhammed, jergilikti turǵyn: - Nil ózeninde tańsyq taksıdiń paıda bolǵany qandaı jaqsy. Biz qalanyń bir qanatynan ekinshi bóligine jetý úshin keptelip, jolda turamyz. Sáıkesinshe, jol shyǵyny da arta túsedi. Al myna kemelermen eń alys degen jerdiń ózine ary ketse 4 AQSh dollaryn jumsaısyz. Al ol qashyqtyqty temir tulparmen eńseretin bolsańyz, eki esege artyq aqsha tóleýińizge týra keledi. Jalpy, bul jobanyń iske asyrylýy alty jyldan beri keıinge ysyrylyp kelgen. Oǵan Mysyrdaǵy saıası jáne ekonomıkalyq daǵdarys qolbaılaý boldy. Endi bastama avtorlary bul qyzmetti tek Kaırde ǵana emes, eldiń ózge de qalalarynda iske qosýdy dittep otyr.