Mysyrdaǵy saılaý: Múbarak pen eks-ury
ASTANA. 16 naýryz. QazAqparat - Mysyrda bolatyn prezıdent saılaýyna 500-den astam adam ótinish bildirgen. Olardyń arasynda Hosnı Múbarak ta bar, dep habarlaıdy Dnı.rý saıty.
Mundaǵy Hosnı Múbarak dep otyrǵanymyz osydan bir jyl burynǵy tóńkeris kezinde taqtan túsirilgen eks-prezıdent Hosnı Múbaraktyń týysqan inisi ári attasy ekenin aıta ketkenimiz lázim.
Saılaý komıssııasynyń ótinish qabyldaǵan 5 kúni ishinde eldegi eń joǵarǵy laýazymnan dámesi bar 564 adam belgili bolǵan. Bul saılaý 2011 jylǵy aqpanda Mysyrdyń burynǵy prezıdenti Hosnı Múbarak taǵynan túsirilgennen keıingi alǵashqy saılaý bolmaq. Prezıdenttikke úmitkerlerdiń arasynda elge tanymal saıasatkerlermen qatar, úı sharýasyndaǵy áıelder, muǵalimder, jýrnalıster, sottar, advokattar, aspazdar jáne basqa da salanyń adamdary bar, deıdi RBK .
Al burynǵy prezıdenttiń inisi ári attasy Hosnı Múbaraktyń aıtýynsha, eger ol prezıdent bolyp saılansa, 30 jyl boıy ornyn bosatpaı, halyqtyń ashý-yzasynyń yqpalymen ǵana taǵynan taıǵan aǵasynyń jolymen júrmeıtin kórinedi.
Prezıdenttikten úmitker taǵy bir tulǵa - 1990-jyldary urlyq jasap, túrmege otyryp shyqqan 64 jasar Muhammed Rashıd degen azamat. Burynǵy sottalǵan basqa bıznesmenderge úlgi kórsetý maqsatynda jáne el ekonomıkasyna kómek retinde óz qaltasynan 50 myń mysyr fýntyn memleket ıgiligine jumsaǵan.
Onyń aıtýynsha, ol óziniń burynǵy jasaǵan qylmystary úshin qatty ókinetin kórinedi. Alaıda jazasyn ótep shyqqandyqtan, endi onyń prezıdent bolýǵa quqyǵy bar. Tipti ol sottalǵandardyń partııasyn quryp, olardyń túrmeden shyqqannan keıin ómirge tez ıkemdelip ketýi úshin sharalar qarastyratynyn málimdepti. Mysyrdyń teledıdarynda suhbat bergen eks-ury, kórermenderge uıaly telefonynyń nómirin aıtyp, óz úıin urlyqtan saqtap qalǵysy keletin kez kelgen adamǵa telefon shalýǵa bolatynyn jetkizgen.
Aıta ketelik, úmitkerlerdi tirkeý 2012 jyldyń 8 sáýirine deıin júrgiziledi. Al saılaý 23-24 mamyrda bolady.
