Mysyrdaǵy kólik apatynan zardap shekkenderdiń arasynda Qazaqstan azamattary joq
ASTANA. QazAqparat - Aldyn ala aqparatqa sáıkes, Mysyrdaǵy Sınaı túbeginiń ońtústiginde bolǵan eki avtobýstyń soqtyǵysýynan qaza tapqandar men jaraqat alǵandardyń arasynda Qazaqstan Respýblıkasynyń azamattary joq. Bul týraly QazAqparat tilshisine QR Syrtqy ister mınıstrliginiń baspasóz hatshysy Nurjan Aıtmahanov málimdedi.
«Aldyn ala aqparatqa sáıkes, Mysyrdaǵy eki avtobýstyń soqtyǵysýynan qaza tapqandar men jaraqat alǵandardyń arasynda Qazaqstan Respýblıkasynyń azamattary joq», - dedi N.Aıtmahanov.
Budan buryn habarlanǵandaı, apat saldarynan 25 adam qaza taýyp, 50-den astamy jaraqattanǵan bolatyn. Jol-kólik oqıǵasy juma kúni Mysyrdaǵy Sınaı túbeginiń ońtústiginde oryn alǵan.
