Mysyrdaǵy áıgili Aleksandrııa kitaphanasynda «Kóshpendiler» trılogııasy tanystyryldy
ASTANA. QazAqparat - 7 sáýir kúni álemge áıigili Aleksandrııa kitaphanasynda tanymal qazaq jazýshysy Іlııas Esenberlınniń arab tiline aýdarylǵan «Kóshpendiler» trılogııasyna arnalǵan ádebı kesh ótti. Bul týraly QazAqparat QR Mysyrdaǵy elshiligine silteme jasap habarlaıdy.
Romandy aýdarý isi Qazaqstannyń Mysyrdaǵy elshiliginiń bastamasymen qolǵa alynǵan bolatyn.
Álemdegi eń ejelgi ári eń úlken kitaphanadaǵy halyqaralyq kitap kórmesi aıasynda uıymdastyrylǵan keshke, qazaq klassıkasynyń shedevrin talqylaý úshin mysyrlyq aqyndar, jazýshylar, synshylar, tilshiler men oqyrmandar qaýymy jınaldy.
Keshtiń ashylýy barysynda elshi Arman Isaǵalıev «Zamanaýı qazaqstandyq mádenıet jahandyq álemde» atty jobany júzege asyrý Qazaqstan men Mysyr arasyndaǵy mádenı baılanystardy arttyra túsetindigin aıtty.
Ol sózinde álemdik klassıkalyq týyndylardyń ajyramas bólshegine aınalǵan І.Esenberlınniń «Kóshpendiler» romany qazaq mádenıeti men ádebıeti úshin erekshe mańyzdy eńbek ekendigin atap ótti. Týyndyda 550 jyl buryn qurylǵan Qazaq handyǵynan keıingi kezderden bastap, Han Kene basqarǵan ult-azattyq kóteriliske deıingi qazaq halqynyń ómiri sýretteledi.
Ult Kóshbasshysy Nursultan Nazarbaev І. Esenberlınniń eńbekteriniń arasynda áıgili «Kóshpendiler» romanynyń orny bólek ekendigin aıtqan.
Sonymen qatar Arman Isaǵalıev eki arasyndaǵy mádenı baılanystardy nyǵaıtý isine ári romannyń arab tilinde jaryq kórýine úles qosqan tanymal Mysyr metsenaty, doktor Hýseın Shafııge «Qazaqstan Respýblıkasynyń dıplomatııasyna 20 jyl» atty estelik medalin tartý etti. Sondaı-aq romandy aýdarǵan mysyrlyq aýdarmashy, Tanat ýnıversıtetiniń professory, doktor Muhammed Rııadqa romandy aýdarǵany úshin QR Mádenıet jáne sport mınıstrliginiń Alǵys haty tabystaldy.
І.Esenerlınniń trılogııasyn talqylaý isine belsendi úles qosqan mysyrlyq ádebıetshiler oǵan álemdik klassıkalyq ádebıettiń shedevri ári Qazaqstan tarıhynyń oqýlyǵy degen baǵa berdi. Synshylar Qazaq handyǵynyń qalyptasý jyldaryn qamtıtyn tarıhı romannyń sol ýaqyttaǵy dara tulǵalar men qazaq halqynyń danalyǵyn onyń bostandyq jolyndaǵy kúreskerligin tanytatyndyǵyn aıtty. Sharaǵa qatysýshylar І.Esenberlındi tipti áıgili mysyrlyq jazýshy, Nobel syılyǵynyń laýreaty Nagıb Mahfýzben de salystyrdy.
Keshtiń qatysýshylary І.Esenberlınniń eńbegindegi obrazdardy, batyrlardy qazaq halqy úshin ǵana emes qatar álem úshin de úlgi bola alatyndyǵyn aıtty. Ult-azattyq qozǵalystyń sımvolyna aınalǵan Kenesary han týraly kóptegen aqyndar men jazýshylar aıtyp ótken. Olardyń arasynda áıgili frantsýz jazýshysy Jıýl Vern de bar.
Sondaı-aq aıta ketetin másele trılogııanyń úshinshi bólimi boıynsha túsirilgen «Kóshpendiler» fılmi de elshiliktiń bastamasymen arab tiline aýdarylyp, mysyrlyq telearnalardan taratylýda. Osy kezde «Qazaqfılm» kınostýdııasy túsirgen «Qazaq handyǵy» serıalyn da arab tiline aýdaryp, ony arab álemine usyný kózdelip otyr.
