Mysyrda týrıstik avtobýs jaryldy: Zardap shekkender arasynda qazaqstandyqtar joq
ASTANA. QazAqparat - 29 jeltoqsan kúni keshke Mysyrda týrıster mingen avtobýs jaryldy. Saldarynan birneshe adam qaza taýyp, 10-ǵa jýyǵy jaraqattandy. Qazaqstan Respýblıkasynyń Syrtqy ister mınıstrliginen málim etkendeı, mert bolǵandar men zardap shekkender arasynda Qazaqstan azamattary joq, dep habarlaıdy «QazAqparat» HAA.
Euronews.com-nyń habarlaýynsha, Gızadaǵy pıramıdalar kesheninen 4 shaqyrym jerde avtobýsqa lańkester shabýyl jasaǵan.
«Qýatty jarylys boldy. Ol kezde biz úıde edik. Jaralanǵandarǵa kómektesýdi sheshtik. Bizge kórshilerimiz qosyldy. Artynsha jedel járdem men órt sóndirýshiler, polıtseıler de jetti», - deıdi oqıǵa kýágerleriniń biri Mahmut.
Ázirge terakt úshin jaýapkershilikti eshbir top óz moınyna alǵan joq.
Kýágerlerdiń aıtýynsha, zardap shekkenderdi ál-Haram aýrýhanasyna alyp ketken.
El úkimeti Jańa jyl merekesi qarsańynda qaýipsizdikti kúsheıtý maqsatynda qosymsha sharalar qarastyra bastady.
