Mysyrda Sýets kanalynyń jańa arnasy ashyldy
ASTANA. QazAqparat - Mysyrda Sýets kanaly ekinshi arnasy resmı túrde ashyldy. Saltanatty rásim áskerı sherýmen bastaldy, aspanda el jalaýyn jelbiretken tikushaqtar ushyp, al arna boıymen áskerı kemeler júzip ótti.
Mysyr prezıdenti Abdel Fattah as-Sısı áskerı kıimde kemelerdiń birine baryp, keme qatynasynyń bastalǵany týraly jarlyqqa qol qoıdy.
Jańa 72-shaqyrymdyq arnanyń ashylý jobasy týraly ótken jylǵy tamyzda habarlanǵan. Bastapqyda úsh jylda aıaqtaý josparlanǵan, alaıda keıinnen merzimdi 12 aıǵa qysqartty. Jańa arna asa aýqymdy qyzmet kórsetý keshenin jáne birneshe ónerkásiptik aımaqty qamtıdy. 8 mıllıard dollar jumsalǵan jańa joba el ekonomıkasyn turaqtandyrýǵa, jańa jumys oryndarynyń ashylýyna qomaqty úles qosady dep boljanyp otyr.
