Mysyrda naýqastanǵan qazaqstandyqqa Astanada dıagnoz qoıyldy
ASTANA. QazAqparat - Búgin elordanyń №1 qalalyq aýrýhanasynyń dárigerleri Mysyrdan aýyryp kelgen Oleg Vasılenkonyń densaýlyǵy jaıynda aıtyp berdi. Ony elorda áýejaıynan birden atalǵan aýrýhanaǵa jatqyzǵan bolatyn, dep habarlaıdy QazAqparat.
«Syrqattanǵan azamat tańerteńgi saǵat 7 shamasynda jedel járdem kóligimen bizge jetkizilgen bolatyn. Sanıtarlyq kólik ony áýejaıdan qarsy aldy. Bizge jetkizgen kezde jaǵdaıy turaqty boldy. Sol ýaqyttan beri bir táýlik ýaqyt ótti. Patsıent densaýlyǵynyń jaqsaryp kele jatqanyn aıtyp otyr. Іsik azdap qaıtty. Aýrýhanadan shyǵaratyn boljamdy merzim - 7 táýlik», - dedi QazAqparat tilshisine telefon arqyly aýrýhana bas dárigeriniń orynbasary Nurlan Jumajanov.
Dárigerdiń aıtýynsha, naýqas sýbtropıkalyq beldeýdiń ekzotıkalyq ınfektsııasyn juqtyrmaǵan.
«Oǵan teriniń jáne teri asty ózeginiń bakterıaldy qabynýy dıagnozy qoıyldy. Mundaı qabyný patogendik mıkrofloranyń túsýinen bolady. Ol mehanıkalyq zaqymdaný joldarymen - terini tyrnaý, qasýdan túsedi. Búkil álemde qabynýdyń emi bireý ǵana - antıbakterıaldy terapııa júrgizý», - dedi ol.
Jumajanovtyń atap ótýinshe, mysyrlyq dárigerler qazaqstandyqqa em-domdy durys jasaǵan. Astanada dál sondaı em birqatar ózgeshelikpen jalǵastyrylýda.
Buǵan deıin Mysyrda otbasymen júrgen qazaqstandyq Oleg Vasılenkonyń denesi irińdep, kúldirep ketkendigi belgili bolǵan edi. Mysyrlyq dárigerler teriniń kúldireý sebebin anyqtaı almaǵan bolatyn.
