Mysyrda «Kazakh Eli Classic» kontserti ótti
ASTANA. QazAqparat - Mysyrdyń Kaır men Aleksandrııa qalalarynda «Kazakh Eli Classic» kontserti ótti. Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.
Baspasóz málimetterine qaraǵanda atalmysh kontsertter «Rýhanı jańǵyrý» prezıdenttik baǵdarlamasy sheńberinde, sondaı-aq Qazaqstannyń elordasy - Astana qalasynyń 20 jyldyq mereıtoıyna oraı Kaır jáne Aleksandrııa qalalarynyń opera teatrlarynda QR Halyq ártisi, Qazaq ulttyq óner ýnıversıtetiniń rektory Aıman Musaqojaevanyń basshylyǵymen ótti. Orkestrge áıgili maestro Aıdar Torybaev jetekshilik etti.
Qoıylymdardy tamashalaýǵa kóptegen kórermender keldi. Qurmetti qonaqtardyń arasynda Qyzyl teńiz provıntsııasynyń gýbernatory, Qazaqstan dostary assotsıatsııasynyń tóraǵasy Ahmed Abdalla, Ońtústik Sınaı provıntsııasynyń gýbernatory Haled Foda, Aleksandrııa provıntsııasynyń gýbernatory Muhammed Sultan, Mysyr mınıstrlikteri men vedomstvolarynyń basshylary, shetelderdiń elshileri men dıplomattary keldi. Olar dástúrli jáne zamanaýı mýzykalyq ónerdi qamtıtyn qazaq ulttyq mádenıetiniń qaıtalanbas sıntezine nazar aýdara otyryp, qazaqstandyq ártisterdiń kásibı deńgeılerin joǵary baǵalady.
Mysyrlyq kórermenderdiń nazaryna Vagnerdiń ývertıýrasy, Nıýrbnerg Meısterzınger operasy, Prokofevtiń birinshi skrıpka kontserti, Shýberttiń toǵyzynshy sımfonııasy sııaqty álemdik klassıkanyń aldyńǵy qatarly shyǵarmalary usynyldy.
Qazaqstandyq jas jáne talantty kompozıtor, «Qazaq Motsarty» atanǵan Rahat-bı Ábdisaǵınnyń «Romantızm jańǵyryǵy» atty shyǵarmasy erekshe qyzyǵýshylyq týdyrdy. Sonymen qatar, «Shabyt» dombyrashylar ansambliniń «Adaı», «Álqıssa» kúılerin asqan sheberlikpen oryndaýy, «Aıgólek» skrıpkashylar ansambli, sondaı-aq ánshiler Batyrjan Smakov, Asqar Muqııat, Ulpan Ábdikárimova, Nazym Saǵyntaı, Marat Aıtymbaıdyń ónerleri jurtshylyqty qýantty.
Qazaqstan Halyq ártisi, ıÝNESKO-nyń beıbitshilik jónindegi ártisi Aıman Musaqojaeva qalyń kópshilikti ózine tánti etken óneri kontsertke erekshe reńk berdi. Qalyń kópshilik oryndarynan turyp qol soǵyp, uzaq ýaqyt qoshemet kórsetti.
Osy kúnderi Qazaqstannyń Kaırdegi elshiligi uıymdastyrǵan is-sharalarǵa Mysyrda turatyn otandastarymyz jáne qazaqstandyq stýdentter qatysyp, týǵan jer áýenderin ańsap tyńdady. Kontsert sońynda olar elshiliktiń qyzmetkerleri men ártisterine keremet is-shara úshin alǵystaryn bildirdi. Olardyń aıtýynsha, Elbasynyń «Rýhanı jańǵyrý» baǵdarlamasy qazaqstandyqtar úshin ulttyq ónerge atsalysýǵa ǵana emes, sheteldikterdi Otanymyzdyń san qyrly mádenıetimen tanystyrýǵa da úlken múmkindik beredi.
Jalpy alǵanda, atalǵan is-sharalar Mysyrdaǵy ónersúıer qaýymǵa umytylmas áser qaldyryp, eki el arasyndaǵy mádenı baılanystardyń odan ári damýyna jáne eki dostas halyqtyń jaqyndasýyna serpin berdi.
