Mysyrda qazaq tili mamandyq retinde oqytylady
ASTANA. QazAqparat - Qazaq tili tuńǵysh ret arab eliniń ýnıversıtetinde mamandyq retinde oqytylatyn bolady. Bul týraly 12 maýsymda Qazaqstannyń Mysyrdaǵy Elshisi Arman Isaǵalıevtyń Kaır ýnıversıtetiniń rektory professor Muhammed ál-Hoshtpen kezdesýi barysynda rastaldy, dep habarlaıdy QazAqparat.
Rektor 2018-2019 oqý jylynan bastap Kaır ýnıversıtetiniń Ádebıet fakýltetinde alǵash ret «Qazaq tili» mamandyǵynyń oqytylatynyn atap ótip, bul baǵytta kórsetken qoldaýy úshin Qazaqstan Elshiligine alǵysyn bildirdi.
«Óz kezeginde Qazaqstan 2018-2019 oqý jylynan bastap mysyrlyq stýdentterge elimizdiń joǵary oqý oryndarynda bilim alý úshin 18 shákirtaqy bóletin bolady», - delingen QR SІM habarlamasynda.
1908 jyly qurylǵan Kaır ýnıversıteti Taıaý Shyǵysta «ál-Azhar» ýnıversıtetinen keıin eń iri joǵary oqý orny bolyp tabylady. Qazirgi ýaqytta ýnıversıtette barlyq salalardy qamtıtyn 20 fakýltet, 10 ǵylymı zertteý ınstıtýty, 1 observatorııa, 2 aýrýhana, 10 medıtsınalyq ortalyq qyzmet kórsetedi. Kaır ýnıversıteti Taıaý Shyǵysta ornalasqanymen keıbir mamandyqtar boıynsha álemdik reıtıngterde aldyńǵy oryndardy alady. Atap aıtqanda, farmatsevtıka salasynda top-100, medıtsınada top-250, ınjenerııada top-200, hımııada top-300 qataryna kiredi. Kaır ýnıversıtetiniń túlekteriniń ishinde Nobel syılyǵynyń laýreattary jazýshy N.Mahfýz, saıası qaıratkerler ıA.Arafat, M.Baradeı, sondaı-aq belgili saıasatkerler men ǵalymdar bar. Ýnıversıtet Qazaqstannyń birqatar joǵary oqý oryndarymen yntymaqtastyq týraly kelisimderge qol qoıǵan.
