Mysyrda eki poıyz soqtyǵysyp, 32 adam qaza tapty
NUR-SULTAN. TASS-QazAqparat – Juma kúni Mysyr eliniń ońtústiginde eki jolaýshy poıyzynyń soqtyǵysýy saldarynan 32 adam qaza bolyp, kem degende 66 adam zardap shekti, dep habarlaıdy QazAqparat TASS-qa silteme jasap.
Qaıǵyly oqıǵa el astanasy Kaır qalasynan ońtústikke qaraı, Soqag provıntsııasynda bolǵan. Úsh vagon aýdarylǵan. Eldiń Densaýlyq saqtaý mınıstrliginiń málimetinshe, oqıǵa ornyna 36 jedel járdem kóligi jiberildi, olar zardap shekkenderdi jaqyn mańdaǵy aýrýhanalarǵa jetkizip jatyr.
Mysyrdyń Bas prokýratýrasy apatty tergeý amaldaryn bastady, al Kólik mınıstri Kámel ál-Ýazır – eki poıyzdyń mashınısterin qamaýǵa alýdy buıyrdy. Tergeýshilerden arnaıy komıssııa qurylyp, onyń jumysyn eldiń premer-mınıstri Mustafa Madbýlı jeke baqylaýyna aldy.
Apat saldarynan eldiń ońtústik baǵytqa qatynaıtyn poıyzdar qozǵalysy tolyq toqtatylǵan.
