Mysyrda Beıbarys Sultan meshitin qalpyna keltirý jumystary bastaldy

KAIR. QazAqparat - Jobanyń ashylý saltanatyna Qazaqstannyń Mysyrdaǵy Elshisi Arman Isaǵalıev, Mysyrdyń  Kóne eskertkishter mınıstri Haled ál-Ananı, jobanyń bas merdigeri «Arab kontraktors» kompanııasynyń Basqarma tóraǵasy Mýhsın Salah, Parlament depýtattary, memlekettik mekemeler basshylary, jýrnalıster, tarıhshy ǵalymdar, belsendiler jáne jergilikti halyq qatysty. Bul týraly QR SІM baspasóz qyzmetine silteme jasap QazAqparat habarlaıdy.

Mysyrdyń  Kóne eskertkishter mınıstri Haled ál-Ananı Kaırdegi ekinshi eń iri meshit bolyp sanalatyn babamyzdyń murasy - Kaır úshin tarıhı mańyzdy nysan ekenin atap ótti.

«Bul meshit - saıası turǵydan Qazaqstan men Mysyr arasyndaǵy qarym-qatynastyń rámizi. Beıbarystyń kindik tamǵan jeri sanalatyn Qazaqstan basshylyǵy men halqy jobanyń aıaqtalýyna úlken mán berip otyr. Atalǵan másele - Mysyr Prezıdenti Abdýl-Fattah Halıl ás-Sısıdiń 2016 jyly Astanaǵa sapary barysynda qos memleket basshylary arasynda qol jetkizilgen ýaǵdalastyqtardyń biri», - dep málimdedi H. ál-Ananı.

Buǵan deıin jobanyń arhelogııalyq jáne sáýlettik zertteýleri, sondaı-aq irgetas jáne jerasty jumystary bitkenin málimdegen mysyrlyq mınıstr meshittiń shańyraqty bólmelerin, dálizin, kúmbezin, munaralaryn, ortalyq alańyn jáne syrtqy qabyrǵalaryn jóndeý jumystary iske asyrylatynyn habarlady. Jobaǵa tehnıkalyq baqylaýdy mysyrlyq arheologtar men tarıhı sáýletshilerden qurylǵan arnaıy komıssııa júrgizedi. Atalǵan komıssııa meshittiń ishki baǵanalaryna buǵan deıin paıdalanylǵan qyzyl kirpishterdi jaramsyz dep taýyp, óz túpnusqasyna uqsas joǵary sapaly granıttik qyshty paıdalanýdy jón dep tapty.

Arman Isaǵalıev Qazaqstan men Mysyr arasyndaǵy tarıhı baılanystardyń rámizine aınalǵan qazaq dalasynyń perzenti Sultan Beıbarystyń murasyn jańǵyrtý jumystarynyń qaıta bastalǵanyn rızashylyqpen atap ótip, Mysyrdyń Memleket jáne Úkimet basshylyǵyna alǵysyn bildirdi.

«Ortaq muramyzdy saqtaýǵa degen Mysyr basshylyǵynyń qamqorlyǵyn joǵary baǵalaımyz. Mysyrdy musylman áleminiń ortalyǵy, Kaırdi Abbasıd halıfatynyń astanasy etip kótergen kemeńger tulǵanyń eskertkishi qaıta qalpyna keltirilip, Mysyrdyń musylman álemindegi erekshe róline, Taıaý Shyǵystaǵy bedeli men abyroıyna taǵy da bir rámiz bolady degen senimdemin», - dedi qazaqstandyq dıplomat.

Quny 12 mln AQSh dollaryn quraıtyn meshitti restavratsııalaý jobasyna Qazaqstan tarapynan  4,5 mln AQSh dollary bólingen. Al Mysyr tarapy 100 mln mysyrlyq fýnt aýdarǵan.

Qalpyna keltirý jumystary 18 aı ishinde bitedi dep kútilýde.