Mysyrda 4,6 myń jyl burynǵy provıntsıaldyq pıramıda tabyldy
ASTANA. QazAqparat - Shyǵys Chıkago ınstıtýtynyń arheologtary qazba jumystary kezinde Mysyrda 4,6 myń jyl buryn salynǵan satyly pıramıda taýyp aldy.
Provıntsıaldyq tıpke jatatyn pıramıda ejelgi Edfa qalashyǵynyń mańynda ornalasqan. Aldyn ala boljam boıynsha, bul pıramıda Gızadaǵy uly pıramıdadan birneshe onjyldyq buryn salynǵan.
Bastapqy kezde Edfadaǵy satyly pıramıdanyń bıiktigi 13 metr bolǵan. Alaıda myńdaǵan jyldar ishinde nysannyń birqatar bóligi buzylyp qalǵan. Qazir onyń bıiktigi 5 metrden aspaıdy. Ol eldi Hýnı jáne Snefrý perǵaýyndary basqarǵan tusta salynǵan jeti provıntsıaldyq pıramıdalardyń birine jatady. Atalmysh jetilikke jatatyn bul pıramıda týraly derekterdiń tabylǵanyna kóp bolsa da, qazba jumystary tek 2010 jyly bastalǵan bolatyn.
Qazba jumystary bastalmas buryn pıramıdanyń beti ony basyp qalǵan qum men qoqystan tazartyldy. Edfadaǵy pıramıda qurylysy jaǵynan Djoser perǵaýynnyń (b.e.d.2670-2640 jyldary basqarǵan) pıramıdasyna uqsas. Qazba kezinde zertteýshiler túrli sýretter men hattardy taýyp aldy. Arasynda qus, tórt aıaqty ań, otyrǵan adam jáne shıyrshyq qaǵazdar bar. Arheologtardyń aıtýynsha, bul jazbalardyń pıramıdanyń túbine jerlengen balalarǵa qatysy bolýy múmkin.
Provıntsıaldyq pıramıdanyń qandaı maqsatta salynǵany belgisiz. Mysaly, ol belgili bir el basqarǵan áýletke qoıylǵan eskertkish bolýy múmkin. Búginge deıin belgili bolǵan jeti pıramıdanyń altaýy eni 18,4 metr, al uzyndyǵy 18,6 metr ólshemimen bir-birine uqsas. Sondaı-aq olardyń ishinde bos keńistik joq. ıAǵnı, ol adam jerleý maqsatynda salynǵan degen boljam bar, dep jazady lenta.ru.
