Mysyrda 21 adam ólim jazasyna kesildi
ASTANA. 26 qańtar. QazAqparat - Mysyr soty Port-Saıd fýtbol alańynda bolǵan soıqanǵa aıypty dep tanylǵan 21 adamdy ólim jazasyna kesti, dep habarlaıdy 24.kz.
Olarǵa qatysty qujattardy endi eldiń Joǵarǵy dinı basshysy qaraıdy. Al aıyptylardyń jaqyndary sot úkiminen keıin tutqyndardyń túrmesine basyp kirmekke árekettengen.
Esterińizge salaıyq, Port-Saıd alańyndaǵy qyrǵyn byltyr aqpan aıynda bolǵan edi. Bul jerde jergilikti «Ál-Masrı» men kaırlik «Ál-Ahlı» fýtbol komandalarynyń oıyny kezinde olardyń jankúıerleri arasynda jappaı tóbeles bolyp, 74 adam qaza bolyp, taǵy júzdegen kórermen jaraqattanǵan. Jalpy atalǵan is boıynsha 73 adamnyń isi qarastyrylǵan edi. Olardyń ishinde tártip saqshylary da bar. Al qalǵan aıyptylarǵa qatysty úkim 9 naýryzda belgili bolady.
