Mysyr úkimeti Sultan Beıbarys meshitin qalpyna keltirýge 181 mln fýnt bóldi

NUR-SULTAN. QazAqparat - Mysyr Arab Respýblıkasy (MAR) Parlamentinde Qazaqstan Elshisi Arman Isaǵalıevpen ótken kezdesý barysynda Ýaqyptar mınıstri Muhtar Djýmaa Kaırdegi Sultan Beıbarys meshitin qalpyna keltirý úshin Mysyr Úkimeti 181 mıllıon fýnt (ıaǵnı, 10,5 mıllıon AQSh dollary) bólgenin jarııalady, dep habarlaıdy QazAqparat syrtqy ister mınıstrliginiń baspasóz qyzmetine silteme jasap.

«Buǵan qosa, Ýaqyptar mınıstrligi óz qarajatynan bul jobany tez aıaqtaý maqsatynda qosymsha 10 mıllıon fýnt bergenin basyp aıtty. Bul jańalyq Qazaqstan men Mysyr arasyndaǵy tarıhı baılanystyń rámizine aınalǵan qazaq dalasynyń perzenti Sultan Beıbarystyń murasyn jańǵyrtý jumystary kóp uzamaı aıaqtalady degen senim uıalatady» delingen habarlamada.

2007 jylǵy 28 qazanda QR men MAR úkimetteri arasynda qol qoıylǵan kelisim negizinde atalǵan meshitti restavratsııalaý jobasy jáne onyń 12,0 mln AQSh dollary mólsherinde bıýdjeti bekitilgen edi. Kelisimge sáıkes, atalǵan somanyń 4,5 mln AQSh dollaryn Qazaqstan tarapy bóldi, al qalǵan bóligin Mysyr úkimeti qarjylandyrýy tıis edi. Joba 2011 jyldyń qazanynda aıaqtalýy kerek bolǵan, alaıda Mysyrdaǵy sol kezde bolǵan saıası jáne ekonomıkalyq daǵdarys sebebimen toqtap qalǵan edi.

2018 jylǵy qazan aıynda, ıaǵnı 7 jyldan soń, Sultan Beıbarys meshitiniń restavratsııalaý jumystary qaıta bastaldy. Joba MAR Kóne eskertkishter mınıstrligi jáne bas merdiger «Arab kontraktors» kompanııasy iske asyrady. Meshittiń shańyraqty bólmeleri, dálizi, kúmbezi, munaralary qaıta kóterilip, ortalyq alań men syrtqy qabyrǵalary jóndeý jumystary júrgiziledi. Jobanyń tehnıkalyq baqylaýyn mysyrlyq arheologtar men tarıhı sáýletshilerden qurylǵan arnaıy komıssııa júrgizedi.

Kólemi boıynsha Mysyrda ekinshi orynda turǵan bul meshit qalpyna keltirilgennen keıin eldegi eń tanymal tarıhı jáne týrıstik ortalyqtardyń birine aınalatynyna kúmán joq.