Mysyr Prezıdentiniń rezıdentsııasy tikenekti symmen qorshaldy
ASTANA. 7 jeltoqsan. QazAqparat - Mysyrda ózin jańa «faraon» dep jarııalaǵan eldiń qazirgi prezıdenti Muhammed Mýrsıge qarsy narazylyq aktsııalary jalǵasyn tabýda.
Beısenbi kúni Kaırde qarsylyq bildirýshiler men memleket basshysyn jaqtaýshylar arasynda qaqtyǵys boldy. Mysyrlyq BAQ-tarǵa silteme jasap Reseı jańalyqtar agenttigi habarlaǵandaı, Ash-Sharkııa provıntsııasyndaǵy úıinen kúsheıtilgen qorǵaýshylardyń ilesýimen prezıdenttiń otbasy qaýipsiz jerge kóshirildi.
Kúsh qurylymdary bul qadamǵa agressıvti bekingen jurttyń Mýrsıdiń úıiniń aldyna qoıylǵan polıtseılerden ótýge jasaǵan birneshe áreketinen keıin bardy. Jastar ǵımarat pen polıtseılerge tastar laqtyrdy. Jurtty tarqatý úshin kóz jasaýratatyn gaz qoldanyldy.
Áskerıler Mysyr astanasyndaǵy prezıdenttik saraıdy radıkaldy jaǵdaılardan qorǵaý úshin tikenekti symmen qorshap tastady. Onymen birge, rezıdentsııa aldynda tankter paıda boldy.
Prezıdenttiń myńdaǵan opponenti eldiń jańa Konstıtýtsııasynyń qabyldanýyna qarsylyq bildirýde. Oǵan sáıkes, «Musylman baýyrlar» qozǵalysynyń múshesi bolyp tabylatyn Muhammed Mýrsıge sheksiz derlik ókilettikter beriledi.
