Mysyr prezıdenti parlament saılaýyn sáýir aıyna belgiledi
ASTANA. 22 aqpan. QazAqparat - Mysyr prezıdenti Muhammed Mýrsı parlament saılaýy sáýirdiń 27-de ótetinin habarlady. Bul jaıynda prezıdenttiń zań keńesshisi Muhammed Gadalǵa silteme jasap «Reuters» habar taratty.
muslim.kz saıtynyń jazýynsha, Parlamenttiń tómengi palatasyna depýtattardy saılaý naýqany tórt kezeńnen turady: ár kezeńde el aımaqtarynyń turǵyndary daýys beredi. Buǵan baqylaýshylardyń jetispeýshiligi sebep bolyp otyr. Saılaý naýqany maýsym aıynda aıaqtalady. Al maýsymnyń 6-da parlament quramynyń alǵashqy májilisi ótedi. Mysyrda baqylaýshylardyń jetispeýshiligi aldyńǵy saılaý naýqanynda da baıqalǵan edi. Ótkendegi saılaý naýqany 2011 jyldyń qarasha aıynan bastalyp, 2012 jyldyń qańtar aıyna deıin sozylǵanyn aıta ketý kerek.
Aqpannyń 21 kúni Mysyr parlamentiniń joǵarǵy palatasy saılaý týraly zańdy maquldaǵan bolatyn. Buǵan Konstıtýtsııalyq sottyń saılaý týraly zańnyń bes tarmaǵyn ózgertýge qatysty talaby túrtki boldy. Joǵarǵy palata Konstıtýtsııalyq sottyń bul talabyn oryndap, atalmysh zańǵa engizilgen túzetýlerdi daýys bermeı-aq qabyldady. Bul túzetýlerdi 25 aqpanda Muhammed Mýrsı bekitýi tıis.
Parlament saılaýy týraly keıin qabyldanǵan zań depýtattarǵa saılaýdan keıin ózge partııaǵa ótýine tyıym salady. Bul túzetýler burynǵy tájirıbe eskerile otyryp, engizilgen edi: Hosnı Múbárak tusynda úmitkerlerdiń kóbisi Ulttyq-demokratııalyq partııaǵa kirgen bolatyn. Sonyń nátıjesinde parlament tek bir partııadan ǵana jasaqtalǵan edi.
Buǵan qosa, saılaý týraly keıin qabyldanǵan zańǵa sáıkes parlamenttiń tómengi palatasyndaǵy úsh oryn táýelsiz el eleýlileri men halyq qalaýlylaryna bólingen. Hosnı Múbárak bılikten ketken soń, 2011 jyly qyzmetin toqtatqan Ulttyq-demokratııalyq partııanyń burynǵy múshelerine 10 jyl boıy saılaýǵa qatysýyna tyıym salyndy.
El tizginin ustaǵan Muhammed Mýrsı 2012 jyldyń jeltoqsan aıynyń sońyna taman referendým nátıjesi boıynsha qabyldanǵan jańa konstıtýtsııaǵa qol qoıǵan edi. Osy Konstıtýtsııaǵa sáıkes, joǵarǵy palatanyń quzyreti keńeıtilgen bolatyn.
