Mysyr prezıdenti oppozıtsııamen ymyraǵa keldi
ASTANA. 9 jeltoqsan. QazAqparat - Mysyr prezıdenti Muhammed Mýrsı jappaı qarsylyq týyndatqan eldiń Konstıtýtsııalyq deklaratsııasy men jańa qujatyn qabyldaýdan bas tartýǵa sheshim qabyldady.
RAA-nyń habarlaýynsha, bul týraly prezıdentpen kezdesken saıası partııalar kóshbasshylarynyń biri málim etken.
Aıta keteıik, lıberaldy-demokratııalyq lagerdegi oppozıtsııa jaqtastary Mysyr prezıdenti Muhammed Mýrsı bastamashy bolǵan Konstıtýtsııalyq deklaratsııa men referendýmǵa qarsylyq tanytýda. Ahýal prezıdenttiń óz quziretin barynsha arttyra túsetin dekret qabyldaýynan keıin tipti ýshyǵa tústi desek te bolady. Konstıtýtsııalyq deklaratsııa jobasy 22 qarasha kúni jarııa etildi, usynylǵan ózgeristerge sáıkes prezıdentke tótenshe quziret beriledi, al eldiń saıası ómirinde ıslam qozǵalysynyń róli kúsheıtiledi.
