Mysyr prezıdenti M.Mýrsı bılikten shettetildi
ÁBÝ-DABI. 4 shilde. QazAqparat - Sársenbi kúni keshke Mysyr armııasy el prezıdenti Muhammed Mýrsı bılikten shettelgenin jáne jaqyn arada bılikti tapsyrýdyń «jol kartasy» qabyldanatynyn málimdedi.
General Abdel Fatah ál-Sıssı Mysyrdyń ulttyq telearnasynyń efırinen memlekette konstıtýtsııanyń kúshi ýaqytsha toqtatylǵanyn, prezıdent M.Mýrsı ornynan túsirilgenin jáne jýyq ýaqytta merziminen buryn prezıdenttik jáne parlamenttik saılaýlar ótetindigin málim etti.
Keshegi kúnniń ekinshi jartysynda Mysyr armııasy prezıdent M.Mýrsı men «Musylman baýyrlar» saıası uıymynyń joǵary basshylyǵynyń ókilettikterin shekteý boıynsha áreketterdi bastady. Atap aıtqanda, Kaırdegi prezıdent saraıyna jaqyn jerde áskerı qorshaýlar ornatylyp, brondy tehnıkalardyń tartylýymen ulttyq armııa qarýly kúshteriniń sherýi ótti.
Mysyrdyń ulttyq qaýipsizdik organdary prezıdent Muhammed Mýrsıdiń elden shyǵýyna tyıym saldy. BAQ-tyń habarlaýynsha, el prezıdenti M.Mýrsı qazir respýblıkalyq gvardııa bólimsheleriniń birinde ornalasqan jáne ol óziniń taqtan ketetindigi týraly aryzǵa qol qoıýǵa nıet bildirip otyrǵan joq.
