Mysyr prezıdenti «Ál-Jazıra» telearnasynyń tilshisine raqymshylyq jasady
ASTANA. QazAqparat - Mysyr eliniń prezıdenti Ábdel Fatah as-Sısı tyıym salynǵan «Aǵaıyndy musylmandar» qozǵalysyna kómekteskeni úshin jeti jylǵa bas bostandyǵynan aıyrý jazasyna kesilgen «Ál-Jazıra» telearnasynyń tilshisi, Avstralııa azamaty Pıter Grıstke raqymshylyq jasady.
Mysyrdyń quqyq qorǵaý organdaryndaǵy aqparat kózderine súıenip silteme jasaǵan Sky News Arabiya telearnasynyń habarlaýynsha, Avstralııa tilshisi dereý óz eline deportatsııalanady.
Budan birneshe aı buryn Mysyr prezıdenti Ábdel Fattah as-Sısı arnanyń sheteldik tilshilerine raqymshylyq jasaý múmkindigin oılastyryp otyrǵanyn málimdegen.
Kaır qalasynyń qylmystyq soty ótken jyldyń 23 maýsymynda Katardyń «Ál-Jazıra» telearnasynyń jeti tilshisin jeti jylǵa bas bostandyǵynan aıyrý jazasyna kesken bolatyn. Atalǵan BAQ-tyń taǵy 11 ókili shartty túrde 10 jylǵa bas bostandyǵynan aıyrý jazasyna kesildi.
