Mysyr «hanzadasy» 10 arystanymen birge Astanaǵa keledi
ASTANA. QazAqparat - Mamyrdyń 20-sy men maýsymnyń 18-i aralyǵynda astanalyq tsırk arenasynda Mysyrdyń eńbek sińirgen artısi Hamada Kýtanyń jetekshiligimen ańyzǵa aınalǵan «10 arystan men Mysyr hanzadasy» attraktsıony kópshilik nazaryna usynylady, dep habarlaıdy QazAqparat qala ákimdiginiń baspasóz qyzmetine silteme jasap.
Hamada alǵash ret torǵa 2 jasynda kirgen, al ań úıretýdi 7 jasynda bastady. Búginde ol álemde eshkimniń qolynan kelmeıtin biregeı trıýktardy oryndaıdy. Hamada Kýta tsırk áýletine - 169 jyl. Bul ónerge alǵash bolyp ájesi Mahasen El Helow kelgen, ol arab elderinde ań úıretken tuńǵysh áıel.
Sonymen qatar, baǵdarlama aıasynda jonglerlar, akrobattar men kóńildi saıqymazaqtar óz kórermenderin qýantpaq. Budan basqa, Reseı men Eýropa festıvaldarynyń altyn júlde ıegerleri, Gınnestiń rekordtar kitabyna engen Úlken Máskeý tsırkiniń artısteri óner kórsetedi. Al áýe gımnasttary eshbir saqtandyrýsyz tsırk kúmbeziniń astynda 10 metrden artyq bıiktikte kúrdeli trıýktardy oryndaıtyn bolady.
