Mysyr bıligi túrik elshisiniń elden ketýin talap etti
ASTANA. 25 qarasha. QazAqparat - Mysyr bıligi túrik elshisiniń elden ketýin talap etip otyr.
Kaır Ankarany qoǵamnyń aldynda Mysyrdy teris jaǵynan kórsetýge tyrysqany úshin jáne eldegi jaǵdaıdy turaqsyzdandyrýdy maqsat tutqan uıymdardy qoldaǵany úshin aıyptaýda, dep habarlaıdy sheteldik BAQ-tar.
Mysyrlyq syrtqy saıası vedomstvonyń baspasóz qyzmeti bul qandaı uıymdar ekenin naqtylamady. Alaıda Reuters agenttiginiń pikirinshe, áńgime «Musylman baýyrlar» jóninde bolyp otyr.
Túrkııa taqtan ketken Múrsıdiń basty jaqtaýshylary bolyp sanalady. Ankara Múrsıdiń bostandyqqa shyǵýyn talap etýde.
