Mysyr Batys Afrıkadaǵy Ebola bezgegine baılanysty karantındik baqylaýdy kúsheıtti
ASTANA. QazAqparat - Kaır halyqaralyq áýejaıynda Batys Afrıkadaǵy Ebola bezgegi indetine baılanysty karantındik baqylaý edáýir kúsheıtildi. Eldiń basty áýejaıynyń ókilderi senbi kúni habarlaǵandaı, mundaı sharalar qaterli aýrýdyń Mysyr aýmaǵyna enip ketýine jol bermeý maqsatynda jasalyp otyr, dep habarlaıdy ITAR-TASS.
Áýejaıdyń karantındik qyzmetiniń dırektory Imad ál-Hashımıdiń aıtýynsha, Saharanyń ońtústigindegi elderden kelip jatqan barlyq jolaýshylar tolyq tekserýden ótkizilýde. Onyń málimetinshe, aýrýdyń alǵashqy belgileri tumaýmen uqsas bolady, sondaı-aq, adam ádetten tys sharshap, dene qyzýy kóterilip, qan qysymy tómendeıdi.
Mysyrdyń densaýlyq saqtaý mınıstrligi elde Ebola bezgeginiń joqtyǵy týraly resmı túrde málimdedi. Alaıda, mamandardyń pikirinshe, Mysyrǵa Gvıneıa, Serra-Leone, Nıgerııa jáne Lıberııa sııaqty elderden keletin ımmıgranttardyń kóbeıýine baılanysty mysyrlyqtar atalǵan aýrýlarǵa ushyramaýyna kepildik joq. «Biz barlyq qaýipsizdik sharalaryn jasap, aýrýdyń el aýmaǵyna ótpeýin qamtamasyz etýge tıispiz», - deıdi Mysyrdaǵy Dúnıejúzilik densaýlyq saqtaý uıymynyń ókili Baha ál-Kýsı.
Aıta keteıik, vırýs búginge deıin 729 adamnyń ómirin qıdy. Barlyǵy 1300 adam osy indetke ushyraǵany tirkelgen. Naýqastardyń 90 paıyzy ajal qushýy múmkin, ázirge bul kórsetkish 55 paıyzǵa jetti. Aýrýdyń oshaǵy barlyq naýqastardyń 70 paıyzyn quraǵan Serra-Leoneniń shyǵysy, Gvıneıanyń ońtústigi jáne Lıberııanyń soltústik aımaqtary bolyp otyr.
