Mysyr Afrıka elderi odaǵy keńesiniń tóraǵasy bolyp saılandy
ASTANA. QazAqparat - Addıs Abebada ótken Afrıka elderi odaǵyna qatysýshy memleket basshylarynyń sammıtinde Mysyr biraýyzdan 2019 jylǵa Afrıka elderi odaǵynyń tóraǵasy bolyp saılandy.
Bul týraly Egıpet prezıdenti keńsesiniń ókili Bassam Radı málimdedi.
AZERTADJ agenttiginiń habarlaýynsha, Efıopııa astanasynda Afrıka odaǵynyń joǵary deńgeıdegi kezekti sammıti ótýde. Sammıt jumysyna Afrıka elderiniń memleket jáne úkimet basshylary qatysýda. Olardyń ishinde Egıpet prezıdenti Abdel Fattah as-Sısı de bar.
Іs-sharaǵa BUU Bas hatshysy Antonıý Gýterrısh, Arab memleketteri Lıgasynyń (AML) Bas hatshysy Ahmed Abý Al Geıt, sondaı-aq birqatar halyqaralyq jáne aımaqtyq uıymdardyń jetekshileri qatysýda.
Kezdesýdiń basty taqyryby - sybaılas jemqorlyqqa qarsy kúres. Sonymen qatar memleket basshylary 2015 jyly qabyldanǵan uzaq merzimdi perspektıvadaǵy ekonomıkalyq jospardy júzege asyrý jaıyn talqylaıdy. Infroqurylymdyq reformalardy ótkizý, afrıkalyq erkin saýda aımaǵyn qurý, áleýmettik jáne ekonomıkalyq jobalardy iske asyrý jáne basqa da ózekti máseleler qarastyrylatyn bolady.
