Mysyqta bolatyn parazıt áıelderdi sýıtsıdke ıtermeleıdi
ASTANA. 5 shilde. QazAqparat - Mysyqtar áıelder úshin qaýipti haıýan bolyp shyqty. AQSh-tyń Merılend ýnıversıtetiniń dáriger ǵalymdary mysyqtarda bolatyn gondii parazıtiniń názik jandardy sýıtsıdke ıtermeleıtinin anyqtady.
Bul týraly Alash aınasy jazady.
ABC News-tiń habarlaýynsha, úı janýarynyń qarnynda bolatyn parazıt áıel mıynda astyrtyn ózgeristerdi týǵyzýy múmkin. Teodor Postolach bastaǵan ǵalymdar toby 45 000 áıeldiń densaýlyǵyn teksergen. Sonyń nátıjesinde Toxoplasma gondii parazıtin juqtyrǵan áıelderdiń arasynda ózine-ózi qol jumsaý qaýpiniń 1,5 ese artqany baıqaldy. Ǵalymdardyń aıtýynsha, mysyqtan juǵatyn mıkroaǵza Jer beti turǵyndarynyń úshten biriniń boıynda bar. Onyń júıke júıesin zaqymdaıtyny sońǵy jyldary ǵana belgili boldy. Ázirshe bul parazıtke qarsy dári-dármek joq. Adamnyń kóńil kúıi men ómirge kózqarasyn túbegeıli ózgertetin Toxoplasma gondii júkti áıelder sábıiniń óli týýyna da sebepshi bolady.
