Mys óndiretin kompanııanyń aktsııasyn satyp alyp mol tabysqa kenelýge bolady – feık

ÓSKEMEN. QazAqparat – Shyǵys Qazaqstan oblysyndaǵy mys óndiretin iri kompanııanyń aktsııasy satylyp jatqany jaıly jalǵan aqparat tarap jatyr, dep habarlaıdy QazAqparat tilshisi.

Sońǵy kúnderi áleýmettik jelilerde mys óndiretin KAZ Minerals kompanııasynyń ınvestıtsııalyq baǵdarlamalaryna qatystyp, seriktesine aınalyp nemese aktsııasyn satyp alyp mol tabysqa kenelýge bolatyny týraly aqparat tarady.

Kompanııanyń korporatıvtik baılanystar departamentiniń basshysy Maqsut Japabaev bunyń shyndyqqa sáıkes kelmeıtinin jetkizdi.

«Alaıaqtar qarjy ınstıtýttarymen shektelmeı, halyqty aldaý maqsatynda ekonomıkanyń basqa sektorlaryndaǵy brendterdi, onyń ishinde KAZ Minerals-ty paıdalanyp júr. Kompanııa azamattarǵa arnalǵan ınvestıtsııalyq baǵdarlamalardy júrgizbeıdi. Jaqynda ol bırjadan ketip, jeke menshik kompanııaǵa aınaldy jáne endi onyń erkin aınalymdaǵy aktsııalary joq. Qazaqstandyqtardy qyraǵylyq saqtaýǵa, aqparattyq qaýipsizdik qaǵıdalaryn ustanýǵa, óziniń jeke derekterin eshkimge habarlamaýǵa, kúmándi aqparatty kompanııanyń resmı resýrstary arqyly tekserýge shaqyramyz. Al eń bastysy – tanys-týystaryńyzǵa «qyrýar qarjy ákeletin» qadamdarǵa barmaý kerektigin eskertińiz», - dedi ol.

Esterińizge sala ketsek, osyǵan deıin ShQO-da sel jáne laı kóshkini qaýpi bar kezeń bastalǵanyn habarlaǵan edik.