Myrzataı Joldasbekovtiń úsh erligi
ASTANA. QazAqparat - Astanada kórnekti memleket jáne qoǵam qaıratkeri, jazýshy, ǵalym-túrkolog, fılologııa ǵylymdarynyń doktory, professor Myrzataı Joldasbekovtiń 80 jyldyq mereıtoıyna oraı ótken saltanatty jıynda A.Baıtursynuly atyndaǵy Til bilimi ınstıtýtynyń dırektory Erden Qajybek Myrzataı Joldasbekovtyń basty úsh erligin atap kórsetti, dep habarlaıdy QazAqparat.
Ǵalymnyń aıtýynsha, Myrzataı Joldasbekovtiń birinshi erligi - 60-jyldardyń aıaǵynda kóne túrki eskertkishteri boıynsha dıssertatsııa qorǵaýy.
«Oktıabr revolıýtsııasynan keıin ǵana adam boldyq dep júrgen resmı tarıhymyzdy Myrzekeń birneshe myń jylǵa aparyp tiredi. Árıne, sońynan úlken daý týyndady, akademııa prezıdentteri sógis aldy, Myrzataıdyń ózi jumystan qýyldy», - dep eske aldy ol.
Joldasbekovtyń ekinshi erligi - Qazaqstanda Shyǵystaný ınstıtýtynyń irgetasyn qalaýy.
«Ózbekstanda bar, Tájikstanda bar, Ázerbaıjanda bar, Grýzııada bar Shyǵystaný ınstıtýtyn Qazaqstanda ashýǵa tyıym salynǵan edi. Kezinde 1922-jyldary Sanjar Ahmedııarov Máskeýdegi Shyǵystaný ınstıtýtynyń dırektory bolǵan, biraq Qazaqstanda bul ınstıtýtty ashýǵa ruqsat etpedi. Qanysh Sátbaev pen Áýezovter bul máseleni kóp kótergen. Egemendik alǵan tusta Myrzataı premer-mınıstrdiń orynbasary edi, máseleni birden qolǵa alyp, jańa ınstıtýttyń irgetasy qalandy. Taǵy bir mańyzdy másele, KSRO-da búkil memlekettermen qarym-qatynas jasadyq, tek Túrkııamen aralasýǵa tyıym salyndy. Múlde baılanys jasaýǵa bolmady. KSRO taramaı turǵanda, kommýnıstik ıdeologııanyń qylyshynan qan sorǵalap turǵan 1991 jyldyń basynda Qazaq Sovet Sotsıalıstik Respýblıkasynyń Prezıdenti Nursultan Nazarbaevtyń shaqyrýymen elimizge Turǵyt Ozal keldi. Turǵyt Ozaldyń kelýi egemendigimiz jolyndaǵy úlken kúrestiń úlken jeńisi boldy. Bul jerde janyn shúberekke túıip, kózsiz erlik jasaǵan Myrzataı Joldasbekov edi», - dep atap ótti ǵalym.
Aıta keteıik , rýna jazba eskertkishterin, Batys Túrik qaǵanatyn, qazaq ádebıetiniń bastaýy men damýyn (jambyltaný) zerttep, 30-dan astam ǵylymı eńbek jazǵan Myrzataı Joldasbekovtiń 80 jyldyq mereıtoıy qarsańynda L.N.Gýmılev atyndaǵy Eýrazııa ýnıversıtetinde halyqaralyq ǵylymı-teorııalyq konferentsııa ótip jatyr. Onda M.Joldasbekovtiń qoǵam qaıratkeri, dıplomat, ǵalym retindegi tulǵasy, kóshpeliler murasy men tarıhı eskertkishteri, túrkitanýdyń keleshegi men damý máseleleri talqylanady.
