Myrzataı Joldasbekovtiń mereıtoıynda ǵalymnyń ózi beınelengen erekshe kilem syıǵa tartyldy
ASTANA. QazAqparat - Kórnekti memleket jáne qoǵam qaıratkeri, jazýshy, ǵalym-túrkolog, fılologııa ǵylymdarynyń doktory, professor Myrzataı Joldasbekovtiń 80 jyldyq mereıtoıyna arnalǵan saltanatty sharalar jalǵasýda, dep habarlaıdy QazAqparat.
L.N.Gýmılev atyndaǵy Eýrazııa ulttyq ýnıversıtetinde 2017 jyldyń 26-27 mamyry kúnderine josparlanǵan «Túrki álemi jáne halyqaralyq baılanystar: tarıh, tulǵa, keleshek» konferentsııasy bastaldy.
Halyqaralyq ǵylymı konferentsııaǵa Armenııa, Ázerbaıjan, Germanııa,Túrkııa, Vengrııa, Ózbekstan, Reseıdiń jáne elimizdiń áıgili ǵalymdary qatysady dep kútilýde. Onda M.Joldasbekovtiń qoǵam qaıratkeri, dıplomat, ǵalym retindegi tulǵasy, kóshpeliler murasy men tarıhı eskertkishteri, túrkitanýdyń keleshegi men damý máseleleri talqylanady.
Konferentsııanyń ashylý saltanatynda elimizdiń memleket jáne qoǵam qaıratkerleri, depýtattar, ákimder, QR joǵary oqý oryndarynyń rektorlary quttyqtaý lebizderin bildirip, syı-syıapattaryn tabystady. Belgili aqyn, ál-Farabı atyndaǵy QazUÝ rektorynyń keńesshisi Baýyrjan Jaqyp M.Joldasbekovke arnaý óleńin oqyp, ál-Farabı altyn medalin taqty. Qazaq ulttyq óner ýnıversıtetiniń rektory, Qazaqstannyń Eńbek Eri Aıman Musaqojaeva dızaıner mamandyǵyn meńgerip jatqan stýdentteri tikken ásem shapandy M.Joldasbekovtiń ıyǵyna japty. Qazaqstan halqy Assambleıasy tóraǵasynyń orynbasary Darhan Myńbaı mereıtoı ıesi beınelengen erekshe kilemdi syıǵa tartty.
«Kilemniń tórkini qazaqtyń Altaıynda. Altaıda Pazyryq atty kilem bolǵan. Buryndary elge eńbegi sińgen, úlken ǵulama ǵalymdardy ǵana beınelengen eken. Sol Shyǵystyń dástúrimen beıneńizdi kilemge saldyq. Bul sizdiń eren eńbegińizdiń belgisi», - dedi Darhan Myńbaı.
«Osy jasyma deıin eshkimge qııanat jasamadym, eshkimniń baǵyn qyzǵanbadym, kisiniń ala jibin attamadym, adamnyń jamany joq dep eseptedim, qazaqty janymdaı kórdim. Uly aǵalarym M.Áýezov, Á.Marǵulan kórmegen táýelsizdikti kórdim, sol baqyttyń nuryna shomylyp júrgen adammyn. Urpaqqa aıtarym, Alla Taǵala bergen jaryq nuryn aqylmen paıdalana bilińder, týra joldan adaspaı, týra júrińder», - dep ósıet aıtty mereıtoı ıesi.
Shara sońynda QR Jazýshylar odaǵynyń tóraǵasy Nurlan Orazalın, QR UǴA akademıgi, f.ǵ.d., professor Serik Qırabaev, QR UǴA akademıgi, professor Jabaıhan Ábdildın jáne Baýyrjan Jaqyp Myrzataı Joldasbekovtiń ómiri men shyǵarmashylyq qyzmetine arnalǵan jańa kitaptardyń tusaýyn kesti.
