Myrzataı Joldasbekov latyn álipbıine qatysty: Kóp bolyp aqyldasqan istiń túbi baıandy

ASTANA. QazAqparat - «Latyn álipbıine kóshetin ýaqyt keldi, degen pikir bildirdi búgin Ortalyq kommýnıkatsııalar qyzmetindegi baspasóz máslıhatynda memleket jáne qoǵam qaıratkeri Myrzataı Joldasbekov.

«Aldymen qazaq tiline negizdelgen latyn álipbıi Parlamenttiń tórinde talqylandy. Ony jurt qoldady. Kóp bolyp aqyldasqan istiń túbi baıandy. Degenmen, onyń da kóptegen kemshiligi bolǵan edi. Halyq ony demokratııalyq úrdispen keńinen talqylady. Sodan mamandar álipbıdi qaıtadan qarady», - dedi ol.

Myrzataı Joldasbekov qazaq tiliniń mamany bolǵanymen bul ispen ómir boıy aınalyspaǵandyǵyn atap ótti. 

«Bul álipbımen qazaq tiliniń mamandary aınalysýy kerek. Bul mamandar sheshetin másele... Elbasy  múmkindik jasap, halyqpen talqylady. Nátıjesinde ótken jyldyń qazanynda bul álipbı bekitildi. Degenmen onyń da kemshilikteri boldy. Noqaty kóbeıip ketti. Tipti keıde bir sózdiń ózinde 7 noqat paıda boldy. Bul másele talqylandy. Mamandar máselege aralasyp, keshe ǵana Elbasynyń 2017 jyly 26 qazanda shyqqan Jarlyǵyna qosymsha Jarlyq jarııalandy. Halqymyzdyń ustanatyn latyn grafıkasyna negizdelgen qazaq tili álipbıi paıda boldy», - dedi qoǵam qaıratkeri.