Myrzataı Joldasbekov: Elbasynyń maqalasy - qazaqtyń jarqyn bolashaǵyn aıqyndap bergen qujat
ASTANA. QazAqparat - Latyn qarpine kóshetin ýaqyt jetti jáne oǵan tolyq múmkindigimiz bar. Bul pikirdi búgin QR Mádenıet jáne sport mnııstrligi janyndaǵy qoǵamdyq keńes uıymdastyrǵan keńeıtilgen májiliste memleket jáne qoǵam qaıratkeri Myrzataı Joldasbekov málim etti.
«Elbasynyń «Bolashaqqa baǵdar: rýhanı jańǵyrý» atty maqalasy - úlken strategııalyq máni bar, qazaqtyń jarqyn bolashaǵyn aıqyndap bergen qujat. Bul materıalda Elbasy qazaq halqy ári qaraı qalaı damıdy, qoǵam qalaı ilgerileý kerek degen máselelerdiń kontseptsııasyn jasady. Sonyń ishinde eń kúrdeli máseleniń biri - latyn qarpine kóshýdi Elbasy buryn da aıtqan. 2012 jylǵy jarııalaǵan «Qazaqstan-2050» Strategııasynda 2025 jyldan bastap latyn álipbıine kóshýge kirisetinimizdi aıtqan. Bul búkil qazaq zııalylaryna maıdaı jaqqan jańalyq boldy. Mine endi búgingi talqylaǵan maqalasynda sol armandarǵa jetý joldary aıqyn kórsetilgen», - dedi M. Joldasbekov.
Onyń aıtýynsha, Elbasy bul maqalada qazaq halqynyń baǵzy zamandardan beri paıdalanǵan barlyq álipbıine - Túrik qaǵanaty zamanynan qalǵan rýnalyq jazýlardan kırıllıtsaǵa deıin sholý jasap, qazaq tiliniń álipbıi tym tereńnen tamyr tartatynyn kórsetti.
"Bul talqylaýdyń basy. Endi ıgerý, zertteý kezeńine kóshemiz. Túsingen adamǵa mundaǵy ár sóılemniń astynda úlken jobalar jatyr. Endi órkenıet kóshinen qalmaý kerek. Buryn latyn qarpine kóshý qalaı bolar eken dep ýaıymdaıtyn edik. Qazir ýaıymdaıtyn eshteńe joq. Balabaqshadan bastap mektep oqýshylaryna deıin barlyǵy latynsha biledi, olar erikti túrde aǵylshyn tilin óz betterimen úırenip jatyr. Demek, eshqandaı qıyndyq joq, latyn qarpine kóshetin ýaqyt jetti jáne oǵan tolyq múmkindigimiz bar", - dep atap ótti ol.
