Myrzataı Joldasbekov: Elbasy Joldaýyn júzege asyrýǵa árbir qazaqstandyq atsalysýy tıis

ASTANA. QazAqparat - Mádenıet jáne sport máseleleri jónindegi Qoǵamdyq keńes Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» týraly Qazaqstan halqyna Joldaýyn talqylady, dep habarlaıdy QazAqparat tilshisi.

Talqylaýǵa mádenıet salasynyń qyzmetkerleri, qoǵam qaıratkerleri, ǵalymdar jáne pedagogtar jınaldy. Onda memleket jáne qoǵam qaıratkeri, kórnekti ǵalym Myrzataı Joldasbekov Joldaýdyń basym baǵyttary jóninde pikir bildirdi.

«Men ózim 1997 jyldan beri jarııalanyp kele jatqan Joldaýlardyń kýásimin. Onda ár jyldary elge kerekti jańalyqtar aıtylady. Bıylǵy joldaý - Elbasynyń 2050 strategııasyn júzege asyrýdyń naqty joldary jáne álemde júrip jatqan tórtinshi ónerkásiptik revolıýtsııanyń damýyna arnalyp otyr. Odan bólek, halyqtyń áleýmettik máseleleri, zeınetaqy júıesi, bilim máselesi de qamtylǵan. Buryn Elbasy bilimdi damytý kerek dese, endi qazaqstandyq bilimniń negizin qalaý qajettigin basa aıtty. Mádenıet, ıdeologııa máselesine de erekshe kóńil bólip otyr. Sondyqtan, Qazaqstannyń árbir azamaty osy joldaýdy júzege asyrýdyń kepiline aınalýy kerek. Árbir qazaqstandyq Joldaýdaǵy mindetterdi oryndaýǵa atsalysýy tıis», - dep atap ótti Joldasbekov QR Ulttyq akademııalyq kitaphanasynda ótken Qoǵamdyq keńes otyrysynda.

Aıta keteıik, búgin Qazaqstan Respýblıkasynyń Prezıdenti Nursultan Nazarbaevtyń kezekti Qazaqstan halqyna Joldaýy jarııalandy. Bıylǵy Joldaý «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikterine» arnalyp otyr.